ខេត្តបាត់ដំបង! រយៈពេល០២ថ្ងៃភ្ញៀវទេសចរជាតិ អន្តរជាតិ ក្នុងនិងក្រៅតំបន់ចូលមកលេងកម្សាន្តតាមរមណីយដ្ឋាននានាក្នុងខេត្តបាត់ដំបងឆ្លងឆ្នាំ សកល២០២១-២០២២មានរហូតជិត ១០ម៉ឺននាក់។
លោក អ៊ុច អ៊ុភីនីស្សារ៉ា ប្រធានមន្ទីរទេសចរណ៍ខេត្តបាត់ដំបងបានប្រាប់ឲ្យដឹងនៅថ្ងៃទី ០២ ខែមករា ឆ្នាំ ២០២២នេះថា÷ ក្នុងថ្ងៃឆ្លងឆ្នាំសកលឆ្នាំ ២០២១-២០២២ រយ:ពេល ២ថ្ងៃ ចាប់ពីថ្ងៃទី ៣១ ខែធ្នូ ឆ្នាំ២០២១ ដល់ថ្ងៃទី ០១ ខែមករា ឆ្នាំ ២០២២កន្លងមកនេះខេត្តបាត់ដំបងបានទទួលស្វាគមន៍ទាំងភ្ញៀវទេសចរជាតិ និងភ្ញៀវទេសចរអន្តរជាតិ ( ដែលមានស្រាប់ ) សរុបចំនួន ៨៥,៥០៩នាក់ ក្នុងនោះភ្ញៀវមួយចំនួនបានចូលទៅលេងកម្សាន្តនៅតាមបណ្តារមណីយដ្ឋានទេសចរ រួចវិលត្រឡប់មកសម្រាកនៅក្នុងទីប្រជុំជនខេត្តវិញ និងភ្ញៀវខ្លះទៀតបានបោះតង់សម្រាកឆ្លងរាត្រីឆ្នាំថ្មីនៅនឹងគោលដៅទេសចរតែម្តង។
លោកបន្តថា ក្នុងរង្វង់ភ្ញៀវទេសចរទាំង ៨៥,៥០៩នាក់ខាងលើភាគច្រើនជាមនុស្សពេញវ័យមានការកើនឡើងចំនួន ៣៦២.០៨% បើប្រៀបធៀបទៅនឹងរយ:ពេលដូចគ្នាកាលពីឆ្នាំ ២០២០- ២០២១ ហើយភ្ញៀវទេសចរដែលមកកម្សាន្តក្នុងខេត្តបាត់ដំបង បានសម្រុកឆ្ពោះទៅកាន់រមណីយដ្ឋាននានា និងពេលរាត្រីភ្ញៀវបានចូលតាមភោជនីយដ្ឋាន អាហារដ្ឋាន និង មណ្ឌលកម្សាន្តនៅក្នុងក្រុងដោយមានភ្ញៀវពេញៗទាំងអស់។
លោក អ៊ុច អ៊ុភីនីស្សារ៉ា បានបញ្ជាក់ថា បើទោះបីព្រឹត្តិការណ៍សហគមន៍២០កុម្ភៈ ត្រូវបានប្រមុខរាជរដ្ឋាភិបាលបានប្រកាសបិទបញ្ចប់ក៏ដោយ តែស្ថានភាពពីការឆ្លងនិងចម្លងមេរោគកូវីដ១៩ នៅតែជាបញ្ហាប្រឈម និងក្តីកង្វល់របស់រាជរដ្ឋាភិបាល និងក្រសួងសុខាភិបាលដែលតម្រូវឲ្យបងប្អូនប្រជាពលរដ្ឋគ្រប់រូបត្រូវរួមគ្នាប្រកាន់ខ្ជាប់នូវវិធានការសុខាភិបាល ៣ការពារ ៣កុំ ឲ្យបានម៉ឺងម៉ាត់ មិនត្រូវធ្វេសប្រហែសខណៈពេលដែលកូវីដ១៩បំប្លែងខ្លួនថ្មី(OMICRON)កំពុងតែឆ្លងរីករាលដាលនៅតាមបណ្តាប្រទេសមួយចំនួន ជាបន្តបន្ទាប់ហើយកម្ពុជាយើងក៏មានអ្នកជំងឺនេះមួយចំនួនផងដែរ(ប្រភេទនាំចូល)៕
