ខេត្តបាត់ដំបង! រថយន្តសាំយ៉ុង០១គ្រឿងត្រូវបានអគ្គិភ័យឆាបឆេះស្ទើទាំងស្រុងខណះដែលម្ចាស់ចតចោលក្រោមដំបូលសំយ៉ាបខាងមុខផ្ទះបង្កការភ្ញាក់ផ្អើលដល់សមត្ថកិច្ចចេញរថយន្តចុះជួយបាញ់ទឹកពន្លត់។
ហេតុការណ៍គ្រោះអគ្គិភ័យឆេះរថយន្តខាងលើនេះបានកើតឡើងនៅវេលាម៉ោង ២២និង៤០នាទីយប់ ថ្ងៃទី២៦ ខែធ្នូ ឆ្នាំ២០២១ ស្ថិតនៅចំណុចភូមិស្តុកប្រវឹក ឃុំស្តុកប្រវឹក ស្រុករុក្ខគិរី ខេត្តបាត់ដំបង។
បើតាមការលើកឡើងពីម្ចាស់រថយន្តឈ្មោះ អឿន ភារម្យ ភេទប្រុស អាយុ៣១ឆ្នាំ និងប្រពន្ធឈ្មោះ ហម ដេត អាយុ ២៩ឆ្នាំ រស់នៅក្នុងភូមិ ឃុំកើតហេតុខាងលើបានបញ្ជាក់ថា នៅព្រលប់ថ្ងៃកើតហេតុខ្លួនបានចតរថយន្តម៉ាកសាំយ៉ុង ពណ៌ស ទុកចោលក្រោមដំបូលសំយ៉ាបនៅខាងមុខផ្ទះ លុះក្រោយមកនៅវេលាម៉ោង ២២និង៤០នាទី ក៏ស្រាប់តែឃើញរថយន្តរបស់ខ្លួនមានអណ្តាតភ្លើងឆាបឆេះឡើងចេញពីក្បាលឡានរហូតបង្កការភ្ញាក់ផ្អើលដល់អ្នកស្រុក ក៏ដូចជាសមត្ថកិច្ចនាំយករថយន្តពន្លត់អគ្គិភ័យចុះមកអន្តរាគមន៍បាញ់ទឹកពន្លត់ដោយប្រើប្រាស់ទឹកអស់ចំនួន ០១ឡាន បង្ក្រាបបានទាន់ពេលមិនឲ្យឆេះរាលដាលបន្ត។
ក្រោយពេលកើតហេតុសមត្ថកិច្ចជំនាញចុះធ្វើកំណត់ហេតុនិងបានបញ្ជាក់ពីទំហំនៃការខូចខាតមានរថយន្ត ០១គ្រឿង និងសម្ភារមួយចំនួនតូច ព្រមទាំងខូចខាតដំបូលសំយ៉ាបខាងមុខផ្ទះផងដែរ ដែលករណីខាងលើមូលហេតុផ្តើមចេញពីរថយន្តឆ្លងចរន្តអគ្គិសនី ដោយខ្លួនឯង ក៏បណ្តាលឲ្យឆេះឡើងតែម្តង តែមិនបណ្តាលអោយមានគ្រោះថ្នាក់ដល់មនុស្សឡើយ។