ខេត្តបាត់ដំបង! រថយន្តធុនធំសណ្តោងសឺមីរ៉ឺម៉កដឹកទំនិញបានបុកជាមួយម៉ូតូពេញទំហឹងបណ្តាលអោយឆេះយ៉ាងសន្ធោសន្ធៅនិងមនុស្សម្នាក់បានស្លាប់ផងដែរ។
លោកវរសេនីយ៍ឯក ស គឹមឡុង អធិការនគរបាលស្រុកមោងឫស្សីបានអោយដឹងថា ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងនៅវេលាម៉ោង ១៩និង៤០នាទី ថ្ងៃទី ២៥ ខែធ្នូ ឆ្នាំ២០២១ នៅតាមបណ្តោយផ្លូវជាតិលេខ៥ ចន្លោះគីឡូម៉ែត្រលេខ ២៥២ ,២៥៣ ត្រង់ចំណុចក្រុមទី ៣០ ភូមិកកោះ ឃុំកកោះ ស្រុកមោងឫស្សី ខេត្តបាត់ដំបង ។
ករណីគ្រោះថ្នាក់ចរាចរណ៍ខាងលើនេះដែរ នៅមុនពេលកើតហេតុគេឃើញរថយន្តធុនធំមួយគ្រឿងម៉ាកហ៊ីយិនដាយ ពាក់ស្លាកលេខ កំពង់ចាម 3A.7927 សណ្តោងសឺមីរ៉ឺម៉ក បើកបរក្នុងទិសដៅពី(បាត់ដំបងទៅភ្នំពេញ) លុះដល់ចំណុចកើតហេតុខាងលើបានបុកជាមួយម៉ូតូម៉ាកស៊ុយសូគីវីវ៉ា ពាក់ស្លាកលេខ បាត់ដំបង1D.9636 ក្នុងទិសដៅផ្ទុយគ្នាបើកបរដោយឈ្មោះ ម៉ាក់ ម៉ៅ ភេទប្រុស អាយុ ៤០ឆ្នាំ រស់នៅភូមិសំរោងអូរទ្រា ឃុំសំរោងក្នុង ស្រុកឯកភ្នំ ខេត្តបាត់ដំបង បណ្តាលឲ្យឆេះស្លាប់ជាមួយម៉ូតូ និងរថយន្តព្រមទាំងសម្ភារនៅលើរថយន្តផងដែរ ដែលភ្លាមៗនោះអ្នកបើកបររថយន្តមិនស្គាល់អត្តសញ្ញាណ(បានរត់គេចខ្លួនបាត់)។
លោកអធិការបានបញ្ជាក់បន្ថែមថា នៅក្នុងហេតុការណ៍នេះដែរភ្លាមៗសមត្ថកិច្ចបានចេញរថយន្តពន្លត់អគ្គិភ័យចំនួន ០៣គ្រឿង ក្នុងនោះ(រថយន្តរបស់ស្រុកមោងឫស្សី ០១គ្រឿង,ស្រុកគាស់ក្រឡ ០១គ្រឿង និងរថយន្តស្រុកសង្កែ ០១គ្រឿង)ចេញអន្តរាគមន៍បាញ់ពន្លត់ដោយប្រើប្រាស់ទឹកអស់ចំនួន ០៦ឡាន។
ក្រោយពេលកើតហេតុសមត្ថកិច្ចជំនាញបានចុះទៅវាស់វែងនិងស្ទូចយកមធ្យោបាយទាំង២មករក្សាទុកនៅការិយាល័យចរាចរណ៍ផ្លូវគោកខេត្តដើម្បីចាត់ចែងតាមផ្លូវច្បាប់ ដោយឡែកសាកសពត្រូវបានប្រគល់អោយសាច់ញាតិយករៀបចំធ្វើបុណ្យតាមប្រពៃណី។