បន្ទាប់ពីបានពិនិត្យ និងពិភាក្សាលើសេចក្តីព្រាងច្បាប់ដែលរដ្ឋសភាបានបញ្ជូនរួចមក គណៈកម្មាធិការអចិន្ត្រៃយ៍ព្រឹទ្ធសភា បានកំណត់យកថ្ងៃព្រហស្បតិ៍ ទី០២ ខែធ្នូ ឆ្នាំ២០២១ វេលាម៉ោង០៨:០០នាទីព្រឹក ដើម្បីប្រជុំព្រឹទ្ធសភាជាវិសាមញ្ញ នីតិកាលទី៤ ដោយលើកយកនូវរបៀបវារៈសំខាន់ៗចំនួន៣មកពិនិត្យនិងផ្តល់យោបល់ ដើម្បីឱ្យសេចក្តីព្រាងច្បាប់នោះមានលក្ខណគ្រប់ជ្រុងជ្រោយនិងបម្រើដល់ផលប្រយោជន៍ប្រជាជននិងសង្គមជាតិ។
ឯកឧត្តម ម៉ម ប៊ុននាងអ្នកនាំពាក្យព្រឹទ្ធសភាបានប្រាប់ក្រុមអ្នកសារព័ត៌មាននៅក្រោយកិច្ចប្រជុំអចិន្ត្រៃយ៍នេះថា របៀបវារៈសំខាន់ៗដែលកិច្ចប្រជុំវិសាមញ្ញព្រឹទ្ធសភានិងលើកយកមកប្រជុំនៅព្រឹកថ្ងៃស្អែកនេះរួមមាន:
១-ពិនិត្យ និងឱ្យយោបល់លើសេចក្តីព្រាងច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២២ ។
២-ពិនិត្យ និងឱ្យយោបល់លើសេចក្តីព្រាងច្បាប់ ស្តីពីការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ២០២០ ។
៣-ពិនិត្យ និងឱ្យយោបល់លើសេចក្តីព្រាងច្បាប់ ស្តីពីការអនុម័តយល់ព្រមលើពិធីសារអាស៊ាន ស្តីពីការពង្រឹងយន្តការដោះស្រាយវិវាទ ។
សូមបញ្ជាក់ថាកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា នាព្រឹកនេញ ប្រព្រឹត្តិឡើងក្រោមវត្តមានដ៏ខ្ពង់ខ្ពស់ របស់សម្តេចវិបុលសេនាភក្តី សាយ ឈុំ ប្រធានព្រឹទ្ធសភានៃព្រះរាជាណាចក្រកម្ពុជា៕
