ខេត្តបាត់ដំបង! ប្រធានសហគមន៍ព្រៃឈើសំឡូត លោក ឌុក ម៉េង បានបង្ហាញពីភាពជោគជ័យ និងបញ្ហាប្រឈមខ្លះៗនៅសហគមន៍របស់លោកក្នុងការចិញ្ចឹមឃ្មុំយកទឹកលក់។
ការធ្វើបទបង្ហាញដល់សិក្ខាកាមដែលជាបណ្ដាញសារព័ត៌មាននិងសហគមន៍នៅក្នុងដំណើរទស្សនកិច្ចស្វែងយល់ និងផ្សព្វផ្សាយស្តីពីការអភិវឌ្ឍន៍ក្នុងសហគមន៍ ដែលដឹកនាំដោយអង្គការក្រុមការងារដើម្បីដោះស្រាយទំនាស់(ACT)កាលពីចុងសប្ដាហ៍កន្លងទៅនេះ លោក ឌុក ម៉េង ប្រធានសហគមន៍ព្រៃឈើសំឡូត ស្ថិតក្នុងភូមិកញ្ចាំង ឃុំស៊ុង ស្រុកសំឡូត បានបង្ហាញពីភាពជោគជ័យរបស់សហគមន៍ក្នុងការចិញ្ចឹមឃ្មុំយកទឹកលក់រយះពេលបីឆ្នាំមកនេះ ដោយផ្តើមចេញពីពូជឃ្មុំ០១ធុង ពង្រីកខ្លួនបានរហូតទៅដល់ជិត ១០០ធុង និងប្រមូលផលយកទឹកលក់ជាបន្តបន្ទាប់ដែលអាចជួយដោះស្រាយអោយជីវភាពគ្រួសារកាន់តែប្រសើរឡើង។
លោកបានបញ្ជាក់បន្ថែមថា ការចិញ្ចឹមឃ្មុំនេះបើអោយថាសម្រាប់ខាតគឺវាមិនខាតទេ ព្រោះក្នុងមួយខែយើងអាចប្រមូលទឹកបានជាមធ្យម ៣លីត្រ ក្នុងមួយធុង ហើយក្នុង០១លីត្រយើងអាចលក់បានក្នុងតម្លៃ ៦ម៉ឺនរៀល ហើយថវិកាដែលបានពីការលក់ទឹកឃ្មុំនេះ មួយចំណែកយើងយកមកដោះស្រាយជីវភាពគ្រួសារនិងមួយចំណែកយកប្រើប្រាស់នៅក្នុងសហគមន៍ ដែលកន្លងមកខាងសហគមន៍ក៏មានកម្មវិធីបង្ហាត់បង្រៀនពីរបៀបចិញ្ចឹមឃ្មុំទៅដល់បងប្អូននៅក្នុងសហគមន៍ផ្សេងៗផងដែរ។
ដោយឡែកបញ្ហាប្រឈមវិញគឺវាពាក់ព័ន្ធទៅនឹងថ្នាំពុលដែលប្រជាកសិករបាញ់ទៅលើតាង៉ែន ទៅលើផ្កាវាធ្វើអោយប៉ះពាល់ទៅដល់ឃ្មុំ ដែលជាសត្វងាយនឹងផុយស្រួយ ព្រោះតាង៉ែនក្នុងមួយអាទិត្យគេបាញ់ថ្នាំម្ដងទៅពីរដងក៏មានដែរ ព្រោះរដូវវស្សាវាសំបូរទៅដោយរោគនិងដង្កូវ ដូច្នេះគេត្រូវបាញ់ញឹក ហើយក្នុងនាមសហគមន៍ក៏បានផ្សព្វផ្សាយជាបន្តបន្ទាប់កុំអោយប្រើប្រាស់ថ្នាំគីមី ព្រោះសម្រាប់ឃ្មុំនេះវាជួយចម្លងកេសញីឈ្មោលដើម្បីអោយដំណាំវាកាន់ ដែលពេលខ្លះបងប្អូនអត់សូវជឿទេ ទាល់តែយកថ្នាំកេសញីឈ្មោលមកបាញ់ទើបកាន់ តែឥឡូវបងប្អូនមានការយល់ដឹងជាបណ្តើរៗហើយកំពុងតែរកឃ្មុំដើម្បីយកទៅដាក់អោយវាកាន់ផ្លែ។
