ខេត្តបាត់ដំបង! សេចក្តីរាយការណ៍ពីសមត្ថកិច្ចបានអោយដឹងថា នៅវេលាម៉ោង ៣និង០០នាទីរំលងអធ្រាត្រ ថ្ងៃទី ២៧ ខែវិច្ឆិកា ឆ្នាំ ២០២១ ស្ថិតក្នុងភូមិបែកចានថ្មីសង្កាត់ព្រែកព្រះស្ដេច ក្រុងបាត់ដំបង មានករណីក្រុមចោរបានផ្លោះរបងផ្ទះរបស់ប្រជាពលរដ្ឋដែលកំពុងដេកលង់លក់ ដោយលួចយកម៉ូតូ ២គ្រឿង និងទ្រព្យសម្បត្តិមួយចំនួនរួចគេចដោយសុវត្ថិភាព។
សមត្ថកិច្ចបានអោយដឹងទៀតថា÷ ករណីខាងលើជនរងគ្រោះបានបាត់ម៉ូតូចំនួន ០២គ្រឿងម៉ាក PCX ពណ៌ឈាមជ្រូកស៊េរីឆ្នាំ ២០១៨ ពាក់ស្លាកលេខ ១Y-៥៩៨៦ និងមួយគ្រឿងទៀតម៉ាក CLick ពណ៌ស ស៊េរីឆ្នាំ ២០១៧ ពាក់ស្លាកលេខ ១AC-៩៦៥៨ និងខ្សែដៃអង្កាំស្រោបមាស ០១ខ្សែ, ប្រាក់រៀល និងប្រាក់ដុល្លារមួយចំនួនទៀត។
ជនរងគ្រោះឈ្មោះ ទិត្យ សុផាត ភេទប្រុស អាយុ ៣២ឆ្នាំ រស់នៅក្នុងភូមិបែកចានថ្មី សង្កាត់ព្រែកព្រះស្ដេច ក្រុងបាត់ដំបង បានអះអាងដែរថា÷ មុនពេលកើតហេតុមានជនមិនស្គាល់មុខបានធ្វើសកម្មភាពផ្លោះរបង រួចចូលទៅក្នុងផ្ទះដើររើកកាយរកសោផ្ទះ ក៏ដូចជាសោទ្វាររបងខាងមុខផ្ទះ និងបានលួចយកលុយ ខ្សែដៃ និងយកសោម៉ូតូដែលទុកលើតុ រួចចាក់សោម៉ូតូនិងសោរបងផ្ទះយកចេញដោយសុវត្ថិភាពតែម្ដង។
ហើយក្រោយទទួលបានព័ត៌មានពាក់ព័ន្ធករណីលួចខាងលើនេះដែរសមត្ថកិច្ចបានបង្ហើបថា÷ ជុំវិញករណីលួចនេះកម្លាំងជំនាញបានកំណត់មុខសញ្ញាបានខ្លះៗហើយ សង្ស័យជាមុខសញ្ញាចាស់ ហើយពេលនេះសមត្ថកិច្ចជំនាញកំពុងធ្វើការស្រាវជ្រាវបន្ត៕
