ខេត្តបាត់ដំបង៖ ខណៈដែលទឹកជំនន់បានហូរធ្លាក់មកពីប៉ែកខាងលើ(ទំនប់បាសាក់ ) នៃស្រុករុក្ខគីរី បន្តជន់ចូលដល់ស្រុកមោងឫស្សី បានបង្កផលប៉ះពាល់ដល់លំនៅឋានរបស់ប្រជាពលរដ្ឋ ជិត ៥០០ខ្នង ព្រមទាំងដំណាំស្រូវ និងដំណាំរួមផ្សំរាប់រយហិកតា រួមទាំងផ្លូវថ្នល់ជិត ១០,០០០ម៉ែត្រ។
លោក ទេព ហន អភិបាលស្រុកមោងឬស្សី បានបញ្ជាក់ឲ្យដឹងនៅថ្ងៃទី ១៦ ខែវិច្ឆិកា ឆ្នាំ២០២១ នេះ ថា រយ:ពេលប៉ុន្មានថ្ងៃមកនេះ ជំនន់ទឹកភ្លៀងដែលហូរធ្លាក់មកគ្របដណ្តប់លើភូមិសាស្ត្រមួយចំនួន នៅក្នុងស្រុកមោងឬស្សី បានបង្កផលប៉ះពាល់ផ្នែកខ្លះក្នុងឃុំជ្រៃ និងឃុំតាលាស់ ជន់លិចលំនៅឋាន ផ្លូវថ្នល់ និងដំណាំស្រូវជាច្រើនហិកតារបស់ប្រជាកសិករ បានរងផលប៉ះពាល់យ៉ាងដំណំ។
លោកអភិបាលស្រុក បានឲ្យដឹងបន្តថា ជំនន់ទឹកភ្លៀងក្នុងមូលដ្ឋានស្រុកមោងឬស្សី និងមួយចំណែកធំទៀត បានហូរស្រុងចាក់មកពីតំបន់ទំនាបរបស់ស្រុករុក្ខគីរី បាននឹងកំពុងគំរាមកំហែងដល់ប្រជាពលរដ្ឋសរុបចំនួន ០២ឃុំ មានឃុំជ្រៃ និងឃុំតាលាស់ ក្នុងស្រុកមោងឬស្សី បង្កផលប៉ះពាល់ដល់លំនៅដ្ឋានរបស់ប្រជាពលរដ្ឋចំនួន ៤៥០ខ្នងផ្ទះ ផ្លូវថ្នល់ដីក្រហមចំនួន ៥៤០០ម៉ែត្រ ផ្លូវក្រាលកៅស៊ូចំនួន ៣០០០ម៉ែត្រ និងដំណាំស្រូវចំនួន ៨៦០ហិកតាទៀត ដែលប្រឈមនឹងការខូចខាត។
ជាមួយគ្នា លោកអភិបាលស្រុក ក៏បានអំពាវនាវដល់ប្រជាពលរដ្ឋនៅក្នុងស្រុកមោងឫស្សី ទាំងអស់ បង្កើនការប្រុងប្រយ័ត្ន ខណៈទឹកជំនន់ដែលហូរធ្លាក់មកពីទំនប់បាសាក់ ស្រុករុក្ខគីរី បានជោរជន់មកដល់មូលដ្ឋានស្រុកមោងឫស្សី មួយផ្នែកធំ ហើយបណ្ដាលអោយលិចទាំងលំនៅឋានរបស់ប្រជាពលរដ្ឋ ផលដំណាំ និងផ្លូវថ្នល់ជាច្រើនកន្លែង ផងដែរ៕