ខេត្តបាត់ដំបង÷ បន្ទាប់ពីមានភ្លៀងធ្លាក់ជាប់ៗគ្នាបង្កជាជំនន់លិចឃុំចំនួន០៣ក្នុងស្រុករុក្ខគីរី អាជ្ញាធរមានសមត្ថកិច្ចបានបង្ខំចិត្តជម្លៀសពលរដ្ឋជាង ៩០គ្រួសារទៅកាន់ទីទួលមានសុវត្ថិភាពជាបណ្តោះអាសន្ន។
នគរបាលនៅមូលដ្ឋានបានប្រាប់ឲ្យដឹងថា÷ នៅយប់ថ្ងៃទី ១៤ ខែវិច្ឆកា ឆ្នាំ ២០២១នេះអាជ្ញាធរមានសមត្ថកិច្ចបានសម្រេចចុះប្រមូលជម្លៀសប្រជាពលរដ្ឋជាង ៩០គ្រួសារទៅកាន់ទីទួលមានសុវត្ថិភាពជាបណ្តោះអាសន្ន ដោយសារស្ថានភាពជំនន់ទឹកភ្លៀងបានហក់ឡើងខ្ពស់ជាបន្តបន្ទាប់ រហូតបង្កការលិចភូមិឋាន ផ្លូវថ្នល់ និងផ្ទះសំបែងពលរដ្ឋជាច្រើខ្នងក្នុងភូមិសាស្ត្រស្រុករុក្ខគីរី នៃខេត្តបាត់ដំបង។
ឥទ្ធិពលនៃជំនន់ទឹកភ្លៀងដែលជន់ឡើងខ្ពស់នេះក៏បានបង្ខំឲ្យមន្ត្រីជំនាញធនធានទឹក និងឧតុនិយមបើកទ្វាទឹកមួយចំនួនដើម្បីបន្ធូរបរិមាណទឹកដែលមានស្តុកនៅក្នុងអាង ជាហេតុនាំឲ្យបរិមាណទឹកភ្លៀងបានគ្របដណ្តប់ធ្ងន់ធ្ងរលើឃុំចំនួន ០៣ ក្នុងនោះមានឃុំបាសាក់ ឃុំព្រែកជីក និងឃុំព្រៃត្រឡាច ក្នុងស្រុករុក្ខគីរី។
ក្នុងចំណោមការប៉ះពាល់នេះអាជ្ញាធរក៏ដូចជាកម្លាំងសមត្ថកិច្ចបានចុះអន្តរាគមន៍ សង្គ្រោះ និងជម្លៀសប្រជាពលរដ្ឋចេញពីលំនៅដ្ឋានទាំងយប់ទៅកាន់ទីទួលមានសុវត្ថិភាពជាបណ្តោះអាសន្នសរុបចំនួន ៩៨គ្រួសារ។
សមត្ថកិច្ចបានបញ្ជាក់ថា គិតត្រឹមម៉ោង ០៧និង២០នាទីព្រឹក ថ្ងៃទី១៤ ខែវិច្ឆិកា ទឹកស្ទឹងបាសាក់ហក់ឡើងរហូតកម្ពស់ ៦,២ម៉ែត្រ ប៉ុន្តែមកដល់ព្រឹកថ្ងៃទី ១៥ ខែវិច្ឆកា ឆ្នាំ ២០២១នេះស្ថានភាពទឹកភ្លៀងបានស្រាកស្រាន្តថយចុះវិញ ហើយកម្ពស់ទឹកជំនន់ក៏បានស្រកស្រុតបន្តិចវិញផងដែរ៕
