ខេត្តបាត់ដំបង៖ បុរសវ័យចំណាស់ម្នាក់ទៀតហើយ ត្រូវបានសត្វដំរីព្រៃព្រេចជាន់សម្លាប់ បង្ខំឲ្យអាជ្ញាធរស្រុកសយដាវ ឈមនឹងតំបន់ព្រំដែនស្រុកកំរៀង ខេត្តបាត់ដំបង ប្រកាសឲ្យប្រជាពលរដ្ឋប្រុងប្រយ័ត្នកុំដើររហេតរហូតពេលយប់។
ប្រភពព័ត៌មានពីពលរដ្ឋនៅតំបន់ព្រំដែនបានបញ្ជាក់ឲ្យដឹងថា នៅថ្ងៃទី១២ ខែវិច្ឆិកា ឆ្នាំ២០២១នេះ អាជ្ញាធរថៃ បានជំរុញការផ្សព្វផ្សាយកាន់តែទូលំទូលាយទៅដល់ប្រជាពលរដ្ឋរបស់ខ្លួនក្នុងតំបន់ឃុំថាប់ឆាង ស្រុកសយដាវ ខេត្តច័ន្ទបុរី ( ប្រទេសថៃ ) និងតំបន់ក្បែរគ្នាឲ្យបង្កើនការប្រុងប្រយ័ត្ន ពិសេសហាមធ្វើដំណើរនៅពេលយប់បើមិនមានការចាំបាច់ ទាំងតាមដងផ្លូវដែលមានសត្វដំរីដើរស្វែងចំណីឆ្លងកាត់ និងទាំងក្នុងព្រៃជាដើម។
ការអំពាវនាវឲ្យប្រជាពលរដ្ឋយកចិត្តទុកដាក់ដោយប្រុងប្រយ័ត្ននេះបន្ទាប់ពីមានមនុស្សស្លាប់ថ្មីទៀតជាករណីទី០៣ នៅយប់ថ្ងៃទី ១១ ខែវិច្ឆិកា នៅក្នុងភូមិសាស្ត្រ ភូមិ៧ ឃុំថាប់ឆាង ស្រុកសយដាវ ខេត្តច័ន្ទបុរី ប្រទេសថៃ ក្បែរនឹងព្រំដែនស្រុកកំរៀង នៃខេត្តបាត់ដំបង។
ចំពោះជនរងគ្រោះដែលស្លាប់ដោយសារដំរីព្រៃជាន់ព្រេចខាងលើនេះត្រូវបានគេបង្ហើបថា ជាបុរស មានវ័យ ៧៦ឆ្នាំ ខណៈដែលរូបគាត់បានចូលទៅក្នុងព្រៃ គោលបំណងប្រមូលផលអនុផលព្រៃឈើនៅក្នុងព្រៃក្បែរភូមិអ្នកស្រុក ក៏ប្រទះនឹងសត្វដំរី ហើយសត្វដំរីដេញជាន់សម្លាប់តែម្តង ដោយនៅកន្លែងកើតហេតុគេបានឃើញស្នាមដានជើងដំរីយ៉ាងច្រើនវក់វីផងដែរ។
គ្រោះថ្នាក់ខាងលើនេះដែរបានធ្វើឲ្យប្រជាពលរដ្ឋនៅក្នុងស្រុកកំរៀង ខេត្តបាត់ដំបង ជាតំបន់ឈមគ្នានឹងទីតាំងកើតហេតុផ្តោតការចាប់អារម្មណ៍ខ្លាំងព្រោះហេតុការណ៍នេះមិនខុសពីហេតុការណ៍កាលពីប៉ុន្មានឆ្នាំមុនឡើយ ដោយសត្វដំរីព្រៃបានដើរស្វែងរកចំណី និងមានការអុកឡុកយាយីប្រជាពលរដ្ឋពីតំបន់មួយ ទៅតំបន់មួយជាច្រើនកន្លែង។
