ខេត្តបាត់ដំបង! នៅព្រឹកថ្ងៃទី១១ ខែវិច្ឆិកា ឆ្នាំ២០២១នេះ លោក ផេង សិទ្ធី អភិបាលនៃគណះអភិបាលក្រុងបាត់ដំបងបានអញ្ជើញជាអធិតីភាពដ៍ខ្ពង់ខ្ពស់ក្នុងពិធីបើកការដ្ឋានស្ថាបនាផ្លូវបេតុងមួយខ្សែប្រវែង ៣៨៩ម៉ែត្រ ផ្លូវលេខ៥០៧ ស្ថិតក្នុងភូមិវត្តលៀបនិងភូមិវត្តរំដួល ក្នុងសង្កាត់ចំការសំរោង ក្រុងបាត់ដំបង ដែលជាកញ្ចប់ថវិកាមូលនិធិសង្កាត់ឆ្នាំ ២០២១ ។
ឈ្លៀតក្នុងឱកាសនោះដែរ លោក ផេង សិទ្ធី អភិបាលនៃគណះអភិបាលក្រុងបាត់ដំបងបានមានប្រសាសន៍ថា ក្នុងនាមរដ្ឋបាលក្រុងបាត់ដំបង លោកសូមថ្លែងអំណគុណទៅដល់រាជរដ្ឋាភិបាលកម្ពុជាដែលដឹកនាំដោយសម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ជាតំណាងរាស្ត្រមណ្ឌលបាត់ដំបង និងជាប្រធានការងារគណបក្សប្រជាជនកម្ពុជាចុះជួយខេត្តបាត់ដំបង និងក៏សូមអរគុណឯកឧត្តម សុខ លូ អភិបាលនៃគណៈអភិបាលខេត្តបាត់ដំបង ដែលលោក និងសម្តេចតែងតែយកចិត្តទុកដាក់ទៅដល់បងប្អូនប្រជាពលរដ្ឋ។
ថ្ងៃនេះដែរដោយសាតែកញ្ចប់ថវិការបស់រដ្ឋយើងបានស្ថាបនាផ្លូវបេតុងមួយខ្សែថ្មីទៀតដែលមានប្រវែង ៣៨៩ម៉ែត្រ និងទទឹង ០៥ម៉ែត្រ ខណៈដែលផ្លូវមួយនេះមានការលំបាកយូរឆ្នាំមកហើយដែលផ្លូវមួយខ្សែនេះតភ្ជាប់ភូមិចំនួន០២ មានភូមិវត្តលៀប និងភូមិវត្តរំដួល។ ហើយបន្ទាប់ពីបានផ្លូវនេះហើយសូមពុកម៉ែបងប្អូនបន្តជួយថែទាំ ដោយសំអាតបរិស្ថាន អនាម័យ ហើយមិនត្រូវដាំដើមឈើគ្របមកលើផ្លូវ និងកុំសាងសង់អ្វីមកលើផ្លូវ ដើម្បីអោយមានទីធ្លាធំទូលាយសម្រាប់បងប្អូនកូនក្មួយធ្វើដំណើរ រត់លេងផងដែរ។
បន្ថែមពីនេះលោកអភិបាលក្រុងក៏បានជម្រុញអោយបងប្អូនប្រជាពលរដ្ឋ ចាប់ពីអាយុ០៥ឆ្នាំឡើងទៅ ដែលមិនទាន់បានចាក់វ៉ាក់សាំង សូមអញ្ជើញទៅចាក់អោយបានគ្រប់ៗគ្នា និងបន្តពាក់ម៉ាស សម្អាតអនាម័យអោយបានខ្ចប់ខ្ជួន ដោយអនុវត្តតាមវិធានការ ៣កុំ ៣ការពារ ដែលជាយ័ន្តការពារខ្លួនយើងមិនអោយឆ្លងជំងឺ។ និងមួយវិញទៀតបើសិនជាបងប្អូនមិនទាន់ចុះឈ្មោះនិងមានឈ្មោះបោះឆ្នោតនៅឆ្នាំ២០២២នេះ សូមមេត្តាអញ្ជើញទៅចុះឈ្មោះបោះអោយបានគ្រប់គ្នា ព្រោះឥឡូវនេះគណៈកម្មការជាតិរៀបចំការបោះឆ្នោតនៅកម្រិតខេត្តយើង គឺមានក្រុមប្រឹក្សាឃុំសង្កាត់បានបង្កើតកន្លែងចុះឈ្មោះបោះឆ្នោត យើងចូលរួមចុះឈ្មោះបោះឆ្នោតជ្រើសរើសក្រុមប្រឹក្សាឃុំសង្កាត់ គឺដើម្បីអោយភូមិ ឃុំ សង្កាត់ យើងមានការរីកចម្រើនទៅមុខបន្តទៀត។