ខេត្តបាត់ដំបង ៖ នៅរសៀលថ្ងៃទី២១ ខែតុលា ឆ្នាំ២០២១នេះក្រុមការងារសាខាកាកបាទក្រហមកម្ពុជាខេត្តបាត់ដំបង ដឹកនាំដោយឯកឧត្តមបណ្ឌិត ប៊ុត គឹមស៊ាន ប្រធានគណៈកម្មាធិការសាខានិងសហការីរួមជាមួយអនុសាខាស្រុកគាស់ក្រឡ បានអញ្ជើញចុះសួរសុខទុក្ខនិងនាំយកអំណោយ មនុស្សធម៌របស់សាខាកាកបាទ ក្រហមកម្ពុជាខេត្តជូនប្រជាពលរដ្ឋរងផលប៉ះពាល់ដោយទឹកជំនន់ទឹកភ្លៀង សរុបចំនួន២២គ្រួសារ ស្ថិតនៅចំណុចបឹងរាម ភូមិតាថុក ឃុំធិបតី ស្រុកគាស់ក្រឡខេត្តបាត់ដំបង ។
ក្នុងពិធីជួបសំណេះសំណាលនាឱកាសនោះឯកឧត្តមបណ្ឌិតប្រធានគណៈកម្មាធិការសាខា បានពាំនាំនូវប្រសាសន៍ផ្តាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់បងប្អូនប្រជាពលរដ្ឋជួបការលំបាក ងាយរងគ្រោះ ដោយគ្រោះទឹកជំនន់ ដោយមិនប្រកាន់ពីវណ្ណៈ ជាតិសាសន៍ ពណ៌សម្បុរ ឬនិន្នាការនយោបាយអ្វីឡើយ និងផ្តាំផ្ញើដល់បងប្អូនប្រជាពលរដ្ឋទាំងអស់ប្រកាន់យកនូវ អនាម័យល្អ រស់នៅស្អាត ហូបស្អាត ផឹកស្អាត ត្រូវមើលថែទាំក្មេងតូចៗកុំឱ្យទៅលេងទឹក ជៀសវាងលង់ស្លាប់ដែលនាំឱ្យគ្រួសារមានវិប្បដិសារីនៅថ្ងៃក្រោយនិងចូលរួមអនុវត្តវិធានការសុខាភិបាលដើម្បីទប់ស្តាត់ការរីករាលនៃជំងឺកូវីដ-១៩និងចូលរួមគោរពច្បាប់ចរាចណ៍ផ្លូវគោកទាំងអស់គ្នា។
ជាមួយគ្នានេះ ឯកឧត្តមបណ្ឌិត បានលើកឡើងថាៈ បញ្ហាគ្រោះធម្មជាតិទឹកជំនន់ជាការព្រួយបារម្ភរបស់រាជរដ្ឋាភិបាល ក៏ដូចជាកាកបាទក្រហមកម្ពុជាដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធានដែល បណ្តាលមកពីបម្រែបម្រួលធាតុអាកាស ក្នុងន័យនេះ ឯកឧត្តមបណ្ឌិតប្រធាន បានស្នើដល់អាជ្ញាធរគ្រប់លំដាប់ថ្នាក់ អនុសាខា កាកបាទក្រហមកម្ពុជា ក្រុមកាកបាទក្រហមឃុំ អ្នកស្ម័គ្រចិត្តភូមិឱ្យចុះតាមដាន និងបំពេញតម្រូវការជូនបងប្អូនប្រជាពលរដ្ឋ នៅក្នុងស្រុក ភូមិ ឃុំ ដែលពិបាក និងមានការខ្វះខាតខ្លាំងឱ្យបានទាន់ពេលវេលា ទាំងក្នុងពេលទឹកឡើង និងពេលទឹកស្រកទៅវិញ។
បន្ថែមពីនេះ ឯកឧត្តមបណ្ឌិត ប៊ុត គឹមស៊ាន ប្រធានគណៈកម្មាធិការសាខាបានអំពាវនាវ ដល់ប្រជាពលរដ្ឋទាំងអស់ត្រូវយកចិត្តទុកដាក់គិតគូរពីបញ្ហា សុខភាព រស់នៅមានអនាម័យ ដោយប្រើប្រាស់ទឹកស្អាត និងពិសាទឹកដាំពុះ និងប្រុងប្រយ័ត្នចំពោះសត្វអសិរពិសគ្រប់ប្រភេទ ហើយឆាប់ប្រកបមុខរបរ បង្កបង្កើនផល ដើម្បីលើកស្ទួយជីវភាពគ្រួសារឡើងវិញនៅក្រោយពេលទឹកស្រកជាពិសេសចូលរួមគោរពចរាចរណ៍ផ្លូវគោក និងថែររក្សាសុខភាព អនាម័យជាប្រចាំតាមការណែនាំរបស់ក្រសួងសុខាភិបាល ជៀសផុតពីជំងឺកូដវីដ-១៩ ទាំងអស់គ្នា។
ហើយអំណោយដែលត្រូវចែកជូននាពេលនេះក្នុងគ្រួសារនីមួយៗទទួលបាន ៖ អង្ករ ២៥គីឡូក្រាម , មី០១កេស ,ទឹកបរិសុទ្ធវីឃែរ០១ធុង ,ត្រីខ១០កំប៉ុង ,សារុង០១ , ក្រមា០១ ,ម៉ាស់ក្រណាត់០៥បន្ទៈ ,អាល់កុល០១ដប និងថវិកាមួយចំនួនផងដែរ។