ខេត្តបាត់ដំបង៖ យុវជនទំនើងចំនួន០៤នាក់ ជាមុខសញ្ញាគប់កញ្ចក់រថយន្តបែកជាហូរហែត្រូវបានកម្លាំងនៃអធិការដ្ឋាននគរបាលស្រុកថ្មគោលបង្ក្រាបឃាត់ខ្លួនបានដើម្បីអនុវត្តតាមនីតិវីធី។
លោកវរសេនីយ៍ទោ សេង លុច អធិការនគរបាលស្រុកថ្មគោលបានប្រាប់ឲ្យដឹងថា÷ ក្រោយទទួលបានពាក្យបណ្តឹងពីជនរងគ្រោះជាម្ចាស់រថយន្តធុនធំចំនួន ០៣ករណី ដែលបណ្តាលរងការខូចខាតបែកកញ្ចក់រថយន្តកន្លងមក លោកបានដឹកនាំកម្លាំងផ្នែកជំនាញបើកការតាមដានស៊ើបអង្កេត និងស្រាវជ្រាវរយ:ពេលជិតមួយសប្តាហ៍រហូតកំណត់មុខសញ្ញាបាន និងឈានដល់ការឃាត់ខ្លួនជនបង្កបានចំនួន ០៤នាក់ នៅថ្ងៃទី ២០ ខែតុលា ឆ្នាំ ២០២១នេះ។
លោកបានបញ្ជាក់ថា ជនបង្កទាំង ០៤នាក់ដែលត្រូវឃាត់ខ្លួនបានពេលនេះរួមមាន! /១-ឈ្មោះ ឡា សុជាតិ ភេទប្រុស អាយុ ២០ឆ្នាំ, /២-ឈ្មោះ សុវណ្ណ ពេជ្រ ភេទប្រុស អាយុ ១៧ឆ្នាំ, /៣-ឈ្មោះ ជួន សុខសាន្ត ភេទប្រុស អាយុ ១៦ឆ្នាំ និងទី/៤-ឈ្មោះ ចាន់ សុជា ភេទប្រុស អាយុ ១៩ឆ្នាំ ទាំង០៤នាក់រស់នៅក្បែរៗគ្នាក្នុងភូមិជ្រោយស្ដៅ ឃុំជ្រោយស្ដៅ ស្រុកថ្មគោល ខេត្តបាត់ដំបង។
ក្រោយពីឃាត់ខ្លួនយកមកសាកសួរ ជនបង្កបានសារភាពថា ពួកខ្លួនពិតជាបានគប់កញ្ចក់រថយន្តខាងលើពិតប្រាកដមែននៅពេលយប់ត្រង់ចំណុចក្រុមទី ២៧ ភូមិជ្រោយស្ដៅ ឃុំជ្រោយស្ដៅ ដោយការគប់នេះមិនមែនជាការគុំកួនសងសឹកនោះទេ គឺដោយសាររថយន្តទាំងអស់ដែលខ្លួនបានគប់ បានបើកភ្លើងហ្វារចាំងភ្នែកពួកគេពេកទើបបាននាំគ្នាគប់លេងតែម្តង។
បច្ចុប្បន្នជនសង្ស័យត្រូវបានឃាត់ខ្លួននៅអធិការដ្ឋាននគរបាលស្រុកថ្មគោលដើម្បីរងចាំគោលការណ៍ថ្នាក់លើក្នងការចងក្រងសំណុំរឿងបញ្ជូនអនុវត្តតាមនីតិវិធី៕