ខេត្តបាត់ដំបង៖ មន្ទីរធនធានទឹក និងឧតុនិយមខេត្តបាត់ដំបង បានចេញសេចក្តីជូនដំណឹងទៅដល់អាជ្ញាធរគ្រប់លំដាប់ថ្នាក់ និងបងប្អូនប្រជាពលរដ្ឋ សូមមានការប្រុងប្រយ័ត្ន ខណៈដែលជំនន់ទឹកស្ទឹងសង្កែនឹងហក់ឡើងសារជាថ្មី។
យោងតាមការចេញផ្សាយរបស់មន្ទីរធនធានទឹក និងឧតុនិយមខេត្តបាត់ដំបង នៅព្រឹកថ្ងៃទី២០ ខែតុលា ឆ្នាំ២០២១នេះ មន្ទីរបានជម្រាបជូនដំណឹងទៅដល់អាជ្ញាធរគ្រប់លំដាប់ថ្នាក់ និងបងប្អូនប្រជាពលរដ្ឋ ជាពិសេសកុមារតូចៗ និងចាស់ជរា ដែលរស់នៅតាមបណ្តាអូរព្រែក ស្ទឹង ទាំងអស់ សូមមេត្តាបង្កើនស្មារតីប្រុងប្រយ័ត្នអោយបានខ្ពស់ ដោយសារផ្នែកខាងលើ(ស្រុកសំឡូត) មានភ្លៀងធ្លាក់ជាបន្តបន្ទាប់ដែលធ្វើអោយអាងស្តុកទឹកមានការពេញ។
ដោយឃើញស្ថានភាពហេតុនេះ មន្ទីរធនធានទឹក និងឧតុនិយមក៏បានបើកទ្វារទឹកអាងទំនប់ពហុបំណងបាត់ដំបង (បើកទ្វារទឹកកំរិតធម្មតា)ដើម្បីបន្ធូរបរិមាណទឹកដែលពេញអាង ដូចនេះសូមអាជ្ញាធរ និងបងប្អូនប្រជាពលរដ្ឋសូមកុំមានការព្រួយបារម្ភណ៍។
គួរបញ្ជាក់ថា កាលពីថ្ងៃទី ១៥ ,១៦ ,១៧ ខែតុលា ឆ្នាំ២០២១កន្លងទៅនេះ ជំនន់ទឹកស្ទឹងសង្កែបានហក់ឡើងខ្ពស់រហូត ១៣,៩៥ម៉ែត្រ បានបណ្តាលអោយមានការលិចលង់បង្កផលប៉ះពាល់ទៅដល់លំនៅឋានរបស់ប្រជាពលរដ្ឋរាប់រយខ្នង និងខូចខាតហេដ្ឋារចនាសម្ព័ន្ធផ្សេងៗជាច្រើនផងដែរ ប៉ុន្តែមិនបណ្តាលអោយមានគ្រោះថ្នាក់ដល់អាយុជីវិតមនុស្ស ឬ សត្វឡើយ៕
