ខេត្តបាត់ដំបង៖ អ្នកជំងឺកូវីដ១៩ប្រមាណចំនួន ១៦២នាក់បានជាសះស្បើយពីមណ្ឌលសម្រាកព្យាបាលវិទ្យាល័យព្រះមុនីវង្ស ស្ថិតក្នុងក្រុងបាត់ដំបង ហើយត្រូវបានក្រុមគ្រូពេទ្យអនុញ្ញាតអោយវិលត្រឡប់ទៅលំនៅដ្ឋានរៀងៗខ្លួនវិញ។
លោកវេជ្ជបណ្ឌិត ចែត្រ សេរីវឌ្ឍ ប្រធានមណ្ឌលព្យាបាលនៅមណ្ឌលវិទ្យាល័យព្រះមុនីវង្ស នៅក្នុងឱកាសដែលលោកចុះអនុញ្ញាតអោយអ្នកជំងឺកូវីដ១៩ ដែលបានព្យាបាលជាសះស្បើយចំនួន ១៦២នាក់ អោយវិលត្រឡប់ទៅលំនៅដ្ឋានវិញនាល្ងាចថ្ងៃទី ១៨ ខែតុលា ឆ្នាំ២០២១នេះ លោកក៏បានណែនាំទៅដល់បងប្អូនទាំងអស់ បើទោះបីជាពេលនេះយើងបានជាសះស្បើយពីជំងឺកូវីដ១៩ ហើយបានវិលត្រឡប់ទៅផ្ទះវិញក៏ពិតមែន ប៉ុន្តែបងប្អូនត្រូវបន្ត
ធ្វើចតាឡីស័កនៅផ្ទះរយៈពេល១៤ថ្ងៃបន្ថែមទៀតដោយមិនអនុញ្ញាតអោយដើរចេញពីផ្ទះរហេតរហូតនោះទេ ហើយបើសិនជាបងប្អូនមានអាការៈអ្វីមិនស្រួលសូមមកទំនាក់ទំនងជាមួយក្រុមគ្រូពេទ្យជាបន្ទាន់។
បន្ថែមពីនេះលោកក៏បានផ្តាំផ្ញើអោយបងប្អូនទាំងអស់ត្រូវចូលរួមក្នុងការទប់ស្កាត់ការរីករាលដាលនូវជំងឺកូវីដ១៩ទាំងអស់គ្នា ពិសេសអនុវត្តតាមគោលការណ៍ណែនាំរបស់រាជរដ្ឋាភិបាល និងក្រសួងសុខាភិបាល គឺប្រកាន់អោយបានខ្ជាប់ខ្ជួននូវ ០៣កុំ និង ០៣ការពារ។