(ប៉ៃលិន ) កម្លាំងប៉ុស្តិ៍នគរបាលរដ្ឋបាលស្ទឹងកាច់ បានទទួលពាក្យបណ្តឹង ករណីបាត់ម៉ូតូចំនួន ០១ករណី នៅចំណុចបន្ទប់ជួលក្រោយសាលាប្រ៊ិក ស្ថិតក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន។ ពី ឈ្មោះ ឡេង សុភា ភេទ ប្រុស អាយុ ២៧ឆ្នាំ មុខរបរ កសិករ មានទីលំនៅបច្ចុប្បន្នរស់នៅភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន បានបាត់ម៉ូតូមួយគ្រឿងម៉ាក Honda Zoomer-X សេរីឆ្នាំ២០១៩ ពណ៌ស លេខតួ៥១០៦៦០៦ លេខម៉ាស៊ីន ៥១០៦៦០៦ ពាក់ស្លាកលេខ កំពង់ស្ពឺ 1P-7488។
តាមការរៀបរាប់ពីម្ចាស់ម៉ូតូបានឲ្យដឹងថា នៅវេលាម៉ោង ០១និង៣០ នាទីយប់ថ្ងៃទី១០ ខែតុលា ឆ្នាំ២០២១ ខ្លួនបានជិះម៉ូតូចេញទៅទិញមីកំប៉ុងហូបហើយជិះមកវិញដោយចាក់សោរកម៉ូតូទុកក្រោមជណ្ដើររួចក៏ចូលទៅគេងនៅខាងក្នុងបន្ទប់លុះព្រឹកឡើងថ្ងៃទី១១ខែតុលានេះពេលចចេញមកពីបន្ទប់វិញស្រាប់តែបាត់ម៉ូតូមិនឃើញតែម្តង រួចក៍ទៅប្តឹងសមត្ថកិច្ចតែម្តង។
ក្រោយពីទទួកពាក្យបណ្ដឹងពីម្ចាស់ម៉ូតូខាងលើ កម្លាំងជំនាញ នៃអធិការដ្ឋាននគរបាលស្រុកសាលាក្រៅ បានសុំការសហការជាមួយកម្លាំងជំនាញ នៃអធិការដ្ឋាននគរបាលស្រុកកំរៀង ដើម្បីជួយស្រាវជ្រាវរកជនសង្ស័យ លុះមកដល់វេលាម៉ោង ១១និង៣០នាទី ថ្ងៃខែឆ្នាំដដែល កម្លាំងជំនាញ នៃអធិការដ្ឋាននគរបាលស្រុកកំរៀង បានស្រាវជ្រាវឃាត់ខ្លួនជនសង្ស័យបានចំនួន ០២នាក់ និងម៉ូតួចំនួន ០១គ្រឿង នៅចំណុចភូមិដូង ឃុំបឹងរាំង ស្រុកកំរៀង ខេត្តបាត់ដំបង ។
លោកអធិការស្រុកបានបន្តថា÷
ជនសង្ស័យទាំង២នាក់មានឈ្មោះដូចខាងក្រោម៖ទី១-ឈ្មោះ វិមុត សិរី ភេទប្រុស អាយុ ២៤ឆ្នាំ មុខរបរ មិនពិតប្រាកដ រស់នៅភូមិកូនខ្លុង ឃុំព្រៃតូច ស្រុកមោងឬស្សី ខេត្តបាត់ដំបង។
ទី២-ឈ្មោះ ម៉េង គឹមឡុង ភេទប្រុស អាយុ ៣៩ឆ្នាំ មុខរបរ មិនពិតប្រាកដ បច្ចុប្បន្នស្នាក់នៅបន្ទប់ជួល ក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
ក្នុងប្រតិបត្តិការនេះដែរសមត្ថកិច្ចបានឃាត់ខ្លួនជនសង្ស័យ២នាក់ ព្រមទាំងវត្ថុតាងដែលប្រមូលរួចដកហូតរួមមាន៖
១-ម៉ូតូម៉ាក Honda Zoomer-X សេរីឆ្នាំ២០១៩ ពណ៌ស ចំនួន ០១គ្រឿង ជារបស់ជនរងគ្រោះ
២-ទួលឡឺវុីសសម្រាប់កាច់សោរកម៉ូតូចំនួន ០១ដើម។
បច្ចុប្បន្ន កម្លាំងសមត្តកិច្ចជំនាញ នៃអធិការដ្ឋាននគរបាលស្រុកសាលាក្រៅ បានយកជនសង្ស័យទាំង២នាក់ និងវត្ថុតាងខាងលើ យកទៅរក្សាទុកនៅ អធិការដ្ឋាននគរបាលស្រុកសាលាក្រៅ ដើម្បីចាត់ការតាមនីតិវិធីច្បាប់៕