(បន្ទាយមានជ័យ)៖ នាថ្ងៃអាទិត្យទី១០ខែតុលាឆ្នាំ២០២១បងប្អូនប្រជាពលរដ្ឋចំនួន៨៦គ្រួសារ ដែលមានជីវភាពខ្វះដោយរងគ្រោះដោយទឹកជំនន់ ស្នាក់នៅទីទួលសុវត្ថភាពផ្លូវវាងក្រុង ស្ថិតនៅឃុំបត់ត្រង់ ក្នុងស្រុកមង្គលបូរី ត្រូវបានលោកអន ស៊ុំ និងលោក ឈើយ ចាន់ណា សមាជិកព្រឹទ្ធសភាភូមិភាគ៤ ឈរជើងនៅខេត្តបន្ទាយមានជ័យ រួមជាមួយ លោក ប៉ាល់ សំអឿន លោកជំទាវ នួម សុភ័ណ និងលោក អុី ឡុង អ្នកតំណាងរាស្ត្រមណ្ឌលខេត្តបន្ទាយមានជ័យ អមដំណើដោយលោក លី សារី ប្រធានក្រុមការងារខេត្តចុះជួយស្រុកមង្គលបូរី និងជាអភិបាលរងខេត្តបន្ទាយមានជ័យ លោក រ័ត្ន ដាស៊ុីណង់ អភិបាលស្រុកមង្គលបូរី និងកងកម្លាំង អាជ្ញាធរភូមិ ឃុំ បានអញ្ជើញចុះសួរសុខទុក្ខ និងនាំយកអំណោយជាគ្រឿងឧបភោគមួយចំនួន ចែកជូន នៅថ្ងៃអាទិត្យ ទី១០ ខែតុលា ឆ្នាំ២០២១។
ថ្លែងក្នុងឱកាសនោះលោក ប៉ាល់ សំអឿនបានមានប្រសាសន៍ពាំនាំការផ្តាំផ្ញើសួរសុខទុក្ខពីសំណាក់ សម្តេចតេជោ ហ៊ុន សែន នាយករដ្ឋមន្ត្រី និងនិងសម្តេចកិត្តព្រឹទ្ធបណ្ឌិត ប៊ុន រ៉ានី ហ៊ុន សែន ដល់បងប្អូនប្រជាពលរដ្ឋទាំងអស់ដោយក្តីនឹករលឹក ជានិច្ចកាលតែងតែយកចិត្តទុក្ខដាក់ខ្ពស់ចំពោះសុខទុក្ខលំបាកប្រជាពលរដ្ឋ គ្រប់ពេលវេលា។
លោក បានបន្តបញ្ជាក់ថា៖ រាជរដ្ឋាភិបាលកម្ពុជា ក៏ដូចអាជ្ញាជរខេត្ត ស្រុក ក្រុង ឃុំ សង្កាត់ យើងមិនទុកអោយប្រជាពលរដ្ឋណាម្នាក់មានបញ្ហា ដោយអត់អាហារនោះឡើយ ជាក់ស្តែងថ្ងៃនេះយើងបាននាំយកគ្រឿងឧបភោគ បរិភោគ ផ្តល់ជូនបងប្អូន ទោះបីជាអំណោយតិចតួចតែជាការរួមចំណែកដ៏សំខាន់ ដើម្បីដោះស្រាយជីវភាពបានមួយគ្រា ដែលយើងកំពុងជួបបញ្ហារងគ្រោះដោយទឹកជំនន់ និងក្នុងដំណាក់កាលនៃការរីករាលជំងឺកូវីដ.១៩។
ក្នុងឱកាសនោះឯកឧត្ដម ប៉ាល់ សំអឿន បានធ្វើការផ្តាំផ្ញើដល់ប្រជាពលរដ្ឋរងគ្រោះទាំងអស់ត្រូវ បង្កើនការយកចិត្តទុកដាក់ ប្រុងប្រយ័ត្នខ្ពស់ ចំពោះក្មេង មនុស្សចាស់លេងទឹក ប្រយ័ត្នសត្វអសិរពិសជាដើម ត្រូវចេះថែទាំសុខភាព សម្អាតអនាម័យជុំវិញខ្លួន កែប្រែទម្លាប់អវិជ្ជមាន និងយកចិត្តទុកដាក់ធ្វើអនាម័យជាប្រចាំ ដើម្បីការពារជំងឺឆ្លងនានាដូចជាជំងឺកូវីដ.១៩ជាដើម ដែលអាចកើតមានឡើងដោយយថាហេតុគ្រោះទឹកជំនន់នេះ។ ជាពិសេសស្របតាមការណែនាំរបស់ក្រសួងសុខាភិបាល និងតាមអនុសាសន៍របស់សម្តេចតេជោ ហ៊ុន សែន គឺ៣ការពារនិង៣កុំ។
សម្រាប់សម្ភារៈអំណោយរួមមាន៖ អង្ករ២៥គីឡូ,មី១កេស,ត្រីខ១យួរ,ទឹកត្រី១យួរ,និងទឹកសុីអុីវ១យួរ៕
