ខេត្តបាត់ដំបង៖ កម្លាំងផ្នែកជំនាញសហការជាមួយកម្លាំងប៉ុស្តិ៍នគរបាលរដ្ឋបាលព្រៃស្វាយ នៃអធិការដ្ឋាននគរបាលស្រុកមោងឬស្សីបានធ្វើការឃាត់ខ្លួនជនសង្ស័យ០១នាក់ជាប់ពាក់ព័ន្ធក្នុងករណីហិង្សាដោយចេតនាមានស្ថានទម្ងន់ទោស។
លោកវរសេនីយ៍ឯក ស គឹមឡុង អធិការនគរបាលស្រុកមោងឫស្សី បានអោយដឹងថា កិច្ចប្រតិបត្តិការនេះធ្វើឡើងនៅវេលាម៉ោង ៩ និង ០០ នាទី ថ្ងៃទី២២ ខែកញ្ញា ឆ្នាំ២០២១ ស្ថិតនៅចំណុចក្រុមទី០៨ ភូមិព្រៃព្រាល ឃុំព្រៃស្វាយ ស្រុកមោងឫស្សី ខេត្តបាត់ដំបង។
ជនសង្ស័យត្រូវបានឃាត់ខ្លួនឈ្មោះ នៅ វ៉ិត ភេទប្រុស អាយុ៣៥ឆ្នាំ មានទីលំនៅភូមិស្តុកប្រវឹក ឃុំស្តុកប្រវឹក ស្រុករុក្ខគិរី ខេត្តបាត់ដំបង បានធ្វើសកម្មភាពដោយយកពូថៅ
វាយទៅលើជនរងគ្រោះឈ្មោះ អ៊ុត ចន្នី ភេទប្រុស អាយុ៣០ឆ្នាំ មានទីលំនៅភូមិអង្គខ្ជាយខាងត្បូង ឃុំដានគោម ស្រុកអង្គរជ័យ ខេត្តកំពត ត្រូវចំក្បាលលើត្រចៀកខាងស្តាំ០១កន្លែងបណ្ដាលឱ្យរងរបួសធ្ងន់ត្រូវបានបញ្ចូនទៅសង្រ្គោះនៅមន្ទីរពេទ្យខេត្តបាត់ដំបង ។
លោកអធិការ ស គឹមឡុង បានឱ្យដឹងទៀតថា ករណីខាងលេីនេះដែរគឺបណ្តាលមកពីជនសង្ស័យខឹងនឹងជនរងគ្រោះដែលធ្លាប់បានវាយធ្វើបាបប្អូនស្រីរបស់ខ្លួនឈ្មោះ នៅ ស្រីមុំ អាយុ២៦ឆ្នាំ នាពេលកន្លងមក ទើបខ្លួនសម្រេចសងសឹកអោយប្អូនតែម្តង។
ក្រោយពីឃាត់ខ្លួនជនសង្ស័យ
ខាងលើត្រូវបានសមត្ថកិច្ចកសាងសំណុំរឿងបញ្ជូនមកកាន់ការិយាល័យជំនាញខេត្តដើម្បីអនុវត្តតាមផ្លូវច្បាប់៕