ខេត្តបាត់ដំបង៖ ពលករខ្មែរប្រុសស្រីជាច្រើននាក់ ត្រូវបានសមត្ថកិច្ចចម្រុះការពារព្រំដែនគោក ឃាត់ខ្លួន ខណៈប្រុងឆ្លងដែនចូលក្នុងទឹកដីថៃ តែជាប់គាំងចេញមិនរួចដោយសារទឹកអូរជន់ឡើងខ្លាំង។
សមត្ថកិច្ចឱ្យដឹងថា ពលករប្រុសស្រីចំនួន០៩នាក់ ត្រូវបានឃាត់ខ្លួននៅវេលាម៉ោង ៣ និង៣៥នាទី យប់ ឈានចូលថ្ងៃទី១៦ ខែកញ្ញា ឆ្នាំ២០២១ ត្រង់ចំណុចមាត់អូរព្រំដែន ស្ថិតក្នុងភូមិអូរល្វា ឃុំជ្រៃសីមា ស្រុកសំពៅលូន អំឡុងពេលកម្លាំងចុះល្បាត។ ពលករទាំងនោះប្រុងឆ្លងដែនចូលទៅក្នុងទឹកដីប្រទេសថៃ ក្នុងគោលបំណងជ្រកកោនស្វែងរកការងារធ្វើ និងដើម្បីដើរសុំទាន ក្រោមការនាំផ្លូវរបស់មេខ្យល់ដែលល្មើសច្បាប់។
សមត្ថកិច្ចបញ្ជាក់ថា ពលករខ្មែរទាំង០៩នាក់ មានស្រី០៣នាក់ ក្នុងនោះជាជនពិការចំនួន០៤នាក់ ផងដែរ។ អ្នកទាំងអស់គ្នាបំរុងឆ្លងដែនចូលក្នុងទឹកដីប្រទេសថៃ ប៉ុន្តែត្រូវស្ទះចេញមិនរួចដោយសារទឹកអូរព្រំដែនជន់ឡើងខ្លាំង ក៏ថយក្រោយមកវិញដើម្បីរងចាំឲ្យទឹកស្រក គាប់ជួនពេលនោះកម្លាំងសមត្ថកិច្ចកំពុងល្បាត ក៏សង្ស័យហៅមកសាកសួរ និងបានឃាត់នាំខ្លួនតែម្តង។
សមត្ថកិច្ចបានអោយដឹងទៀតថា! ករណីពលករឆ្លងដែនខុសច្បាប់ខាងលើ ក្រោយធ្វើការសាកសួររួច សមត្ថកិច្ចបានអប់រំណែនាំតម្រូវឲ្យធ្វើកិច្ចសន្យាឈប់ប្រព្រឹត្ត ហើយឲ្យវិលត្រឡប់ទៅស្រុកកំណើតវិញរៀងៗខ្លួនផងដែរ៕