ខេត្តបាត់ដំបង! បុរសម្នាក់សង្ស័យមានវិបត្តផ្លូវចិត្ត បានប្រើប្រាស់នូវសារធាតុញៀនលើសកម្រិត ក៏សម្រេចធ្វើអត្តឃាតដោយចងកសម្លាប់ខ្លួន។
សមត្ថកិច្ចបានអោយដឹងថា! ហេតុការណ៍ប្រទះឃើញបុរសដែលធ្វើអត្តឃាតដោយចងកខាងលើនេះ បានកើតឡើងនៅវេលាម៉ោង ១៥និង២០នាទី នៅថ្ងៃទី១៥ ខែ កញ្ញា ឆ្នាំ២០២១ នៅចំណុចក្រុមទី៦ ភូមិបឹងត្របែក ឃុំស្តុកប្រវឹក ស្រុករុក្ខគិរី ខេត្តបាត់ដំបង ។
ជនរងគ្រោះមានឈ្មោះ ម៉ៅ ឌីត ភេទប្រុស អាយុ២៨ ឆ្នាំរស់នៅក្រុមទី៦ ភូមិបឹងត្របែក ឃុំស្តុកប្រវឹក ស្រុករុក្ខគិរី ខេត្តបាត់ដំបង បានចងកនៅលើផ្ទះបណ្តាលអោយស្លាប់ពេលបញ្ជូនទៅសង្គ្រោះនៅមន្ទីរពេទ្យ ។
បើតាមការបំភ្លឺពីម្តាយរបស់សាកសពខាងលើបានអោយដឹងថា នៅថ្ងៃកើតហេតុ កូនប្រុសរបស់គាត់បានឡើងលើផ្ទះសង្ងំជាច្រើនម៉ោង ខ្លួនឆ្ងល់ក៏ឡើងទៅមើល ស្រាប់តែឃើញកូនប្រុសគាត់បានយកខ្សែរចងករនឹងរតផ្ទះ ឃើញដូចនោះខ្លួនក៏ស្រែកឆោឡោហៅគេអោយមកជួយកូនប្រុសរបស់គាត់ដឹកបញ្ចូនដល់មន្ទីពេទ្យ តែជាអកុសលដោយមានសភាពធ្ងន់ធ្ងរពេកក៏បានដាច់ខ្យល់ស្លាប់តែម្តង ដោយមូលហេតុជនរងគ្រោះមានវិបត្តផ្លូវចិត្ត (សង្ស័យប្រើប្រាស់នូវសារធាតុញៀនលើសកម្រិត)។
ក្រោយកើតហេតុ កម្លាំងផ្នែកជំនាញសហការណ៍ជាមួយក្រុមគ្រូពេទ្យចុះទៅត្រួតពិនិត្យសាកសពជនរងគ្រោះខាងលើ ឃើញថាសពខាងលើពិតជាបានចងកធ្វើអត្តឃាតខ្លួនឯងពិតប្រាកដមែន ក្រោយបញ្ចប់ការងារ ផ្នែកជំនាញបានធ្វើកំណត់ហេតុប្រគល់សាកសពខាងលើអោយទៅក្រុមគ្រួសារដើម្បីចាត់ចែងធ្វើបុណ្យតាមប្រពៃណី។