ខេត្តបាត់ដំបង! ប្រជាពលរដ្ឋដែលជាអ្នកប្រកបរបរដាំដំណាំលក់ បានត្អូញត្អែរពីតម្លៃម្រះចុះថោកនៅរដូវដែលកំពុងប្រមូលផល ដោយចំណាយដើមទុនអស់ច្រើន អាចប្រឈមនឹងការខាតបង់មិនមានប្រាក់ចំណេញ។
ប្រជាពលរដ្ឋឈ្មោះ ណារិន រស់នៅភូមិអូរល្មូន ឃុំឃ្លាំងមាស ស្រុករតនមណ្ឌល នៃខេត្តបាត់ដំបង បានប្រាប់អ្នកយកព័ត៌មានយើងអោយដឹងថា គ្រួសារលោកស្រីក្រៅពីការដាំដំឡូងមី និងពោត ពួកគាត់បានចាប់យកការដាំដំណាំបន្លែលក់ផងដែរ ដែលបច្ចុប្បន្ននេះពួកគាត់បានដាំដំណាំប្រភេទបន្លែម្រះ នៅក្នុងទំហំផ្ទៃដី ០១ហិកតា ស្មើនឹង ៤៨ រង។
ចំពោះដំណាំម្រះនេះ គឺយើងប្រើរយៈពេល ០១ខែ ២០ថ្ងៃ ទើបយើងបានប្រមូលផល ហើយការប្រមូលផលនេះដែរបើសិនជាបានត្រឹមតម្លៃក្នុង០១គីឡូក្រាម ២០០០រៀល គឺយើងអាចចំណេញ ព្រោះវាអស់ដើមច្រើន ទៅលើទ្រើងអាសី ជី និងឈ្នួលកម្មករច្រើន ខណៈដែលពេលនេះក្នុង០១គីឡូក្រាមលក់បានត្រឹមតែ១០០០រៀលប៉ុណ្ណោះ ទើបពេលនេះលោកស្រីបង្ខំចិត្តធ្វើតែពីរនាក់ប្តីប្រពន្ធ ដោយមិនជួលយកកម្មករនោះឡើយ។
លោកស្រីបានបញ្ជាក់បន្ថែមថា អត្ថប្រយោជន៍ម្រះ គឺយើងអាចយកទៅ ចៀនជាមួយពងទា ស្ងោរញាត់ជាមួយសាច់ជ្រូក ខ ឬធ្វើស៊ុបម្រះ ទៅតាមចំណង់ចំណូលចិត្តរៀងៗខ្លួន ឬក៏អាចកោសពូតយកទឹកហូបដើម្បីអោយស្រួលខ្លួនផងដែរ ដែលក្នុងមួយថ្ងៃលោកស្រីអាចប្រមូលផលបានពី ជាង ៣០០គីឡូក្រាម ទៅ ៤០០គីឡូក្រាម។
