ខេត្តបាត់ដំបង ៖ ប្រជាពលរដ្ឋរស់នៅក្នុងស្រុក រតនៈមណ្ឌល បាន ចាប់ផ្តើមប្រកបរបរ ដាំដំណាំទំពាំងបារាំងលក់ ព្រោះវាមានតម្លៃខ្ពស់ និងមានទីផ្សារល្អ។
ប្រជាពលរដ្ឋឈ្មោះ សុខា រស់នៅ ក្នុងភូមិ អូរល្មូន ឃុំ ឃ្លាំងមាស ស្រុក រតនៈមណ្ឌល នៃខេត្តបាត់ដំបង បានឲ្យដឹងនៅថ្ងៃទី០៦ ខែកញ្ញា ឆ្នាំ២០២១ថា គ្រួសារលោកស្រីបាន ចាប់យក មុខរបរ ដាំដំណាំប្រភេទទំពាំងបារាំងនេះ បានរយៈពេល០២ ឆ្នាំ មកហើយ នៅលើផ្ទៃដីទំហំ០២ ហិកតា ដោយ ទទួលបាន ជោគជ័យ និងអាច រកប្រាក់ ចំណូល បាន ច្រើន គួរសម ។
ម្ចាស់ចំការខាងលើបានប្រាប់ថា មុខរបរដាំដំណាំប្រភេទទំពាំងបារាំងនេះ គឺយើងប្រើប្រាស់ពេលយូរជាងដំណាំរួមផ្សំផ្សេងៗ ព្រោះយើងត្រូវការបណ្ដុះ កូនរយៈពេលបីខែ ទើបបានយកមកដាំ ហើយចំពោះការដាំវិញ យើងដាំរយៈពេលបីខែ ទៅបីខែជាងទៀងទើបវាចាប់ផ្ដើមអោយផលជាហូរហែបន្តបន្ទាប់ ដែលឆ្នាំប្រមូលផលដំបូងនេះ ក្នុងមួយថ្ងៃជាមធ្យមយើងអាចដកបានចំនួន ៣០គីឡូក្រាម ដែលប្រមូលដកក្នុងមួយថ្ងៃឬពីរថ្ងៃម្តង ដោយក្នុង ០១ គីឡូក្រាម យើងអាចលក់បានក្នុងតម្លៃចាប់ពី៨០០០រៀល ទៅ១០០០ ០រៀល ដោយម៉ូ យមក ប្រមូលទិញ ដល់ផ្ទះ អស់ៗ មិនដែល មាន សល់ នោះទេ ។
ម្ចាស់ចំការដដែលបានបញ្ជាក់ថា ការដែលគ្រួសារលោកស្រីចាប់យករបរដាំដំណាំទំពាំងប្រភេទនេះ ព្រោះវាជាប្រភេទបន្លែម្យ៉ាងដែលយើងអាចយកទៅធ្វើម្ហូបបានច្រើនមុខ ដូចជា, សម្លរ ,ឆា ,ស្ងោរ ,ជ្រក់ ,ឬស្រុះធ្វើអន្លក់ក៏បានទៅតាមចំណង់ចំណូលចិត្តផ្សេងៗគ្នា និងមានទីផ្សារល្អ តម្លៃសមរម្យ និងវាមានអាយុកាលប្រមូលផលវែង រហូតទៅដល់ ១០ឆ្នាំ ទៅ ២០ឆ្នាំផងដែរ។
