(ខេត្តប៉ៃលិន)៖ ពលករខ្មែរចំនួន៤៨នាក់ត្រូវបានក្រុមទាហានឈុតខ្មៅថៃចាប់ខ្លួនខណ:ដែលពួកគេលបឆ្លងដែនដោយខុសច្បាប់ ចូលទឹកដីថៃដើម្បីធ្វើជាកម្មករបេះផ្លែមៀននៅក្នុងខេត្តច័ន្ទបុរីប្រទេសថៃ។
ការឃាត់ខ្លួននេះបានធ្វើឡើងកាលពីវេលាម៉ោង៤ទៀបភ្លឺ ថ្ងៃទី៤,ខែកញ្ញា,ឆ្នាំ២០២១ត្រង់ចំណុចភូមិ៤ក្នុង ឃុំខ្លងយ៉ៃ ស្រុកពោងណាំរ៉ន ខេត្តច័ន្ទបុរី ប្រទេសថៃ ។
ប្រភពព័ត៌មានបានឲ្យដឹងថា នៅមុនពេលឃាត់ខ្លួនគឺមានពលករខ្មែរចំនួន ៤៨នាក់ បានលបឆ្លងព្រំដែនចូលទៅក្នុងទឹកដីថៃ ដោយបាននាំគ្នាដើរកាត់តាមចំការ ស្របពេលដែលកម្លាំងទាហានឈុតខ្មៅថៃ កំពុងល្បាតក៏បានស្ទាក់ចាប់ ក្នុងនោះប្រុស១៨ស្រី ២៣ នាក់ និងក្មេងតូចៗ៧នាក់ ។
ប្រភពបានបន្តទៀតថា ក្រោយការចាប់ខ្លួនពលករខ្មែរបានសារភាពថា ពួកគេមកពីខេត្តប៉ៃលិន ដោយចូល តាមច្រករបៀងកាត់ព្រៃ ដើម្បីទៅធ្វើការនៅក្នុងចំការមៀនឲ្យជនជាតិថៃ ក្នុងខេត្តច័ន្ទបុរី ដោយក្នុងម្នាក់ៗត្រូវចំណាយអោយមេខ្យល់ ៥.០០០ បាតហើយមេខ្យល់បាននាំឆ្លងដែនចូលទៅទឹកដីថៃ តែក៏ត្រូវឃាត់ខ្លួនតែម្តង។
ក្រោយពេលឃាត់ខ្លួន ក្រុមយោធាថៃបានសង្គេតឃើញថា ពួកគេគ្មានច្បាប់អនុញ្ញាតត្រឹមត្រូវឡើយ ទើបត្រួតពិនិត្យសុខភាពពួកគេទាំងអស់ និងបានបញ្ជូនទៅអោយភាគីកម្ពុជាវិញ ដើម្បីធ្វើចត្តាឡីស័កនៅទីនោះតែម្តង។
ចំណែកលោកវរសេនីយ៍ទោ សួន ដាលីន ប្រធានក្រុមការងារទំនាក់ទំនងព្រំដែនកម្ពុជា -ថៃ ច្រកទ្វារអន្តរជាតិព្រំបានប្រាប់ក្រុមអ្នកសារព័ត៌មានយើងថា លោកមិនទាន់ទទួលបានដំណឹងនេះនៅឡើយទេ ហើយខាងលោកនឹងទាក់ទងទៅខាងភាគីថៃដើម្បីសួរនាំឲ្យដឹងច្បាស់៕
