ខេត្តព្រះសីហនុ៖ អ្នកគ្រូពេទ្យម្នាក់នៅមន្ទីរពេទ្យបង្អែកខេត្តព្រះសីហនុ ដែលជាពេទ្យព្យាបាលអ្នកជំងឺកូវីដ១៩ក្នុងខេត្តព្រះសីហនុ បានទទួលមរណភាពកាលពីយប់ ថ្ងៃ២៩ ខែសីហា ឆ្នាំ២០២១ ពេលនាំយកទៅសង្គ្រោះព្យាបាលនៅមន្ទីរពេទ្យរាជធានីភ្នំពេញ។ មរណភាពរបស់អ្នកគ្រូពេទ្យរូបនេះ«បើយោងតាមក្រុមវេជ្ជបណ្ឌិតមន្ទីរពេទ្យបង្អែកខេត្តព្រះសីហនុបញ្ជាក់ថា គាត់មានវិជ្ជមានជំងឺកូវីដ១៩ និងមានជំងឺថ្លើមធ្ងន់ធ្ងរផង»។
អ្នកគ្រូពេទ្យដែលទទួលមរណភាពនេះ មានឈ្មោះ អ៉ឹម ស្រីនិ ជាគ្រូពេទ្យបម្រើការងារ នៅមន្ទីរពេទ្យបង្អែកខេត្តព្រះសីហនុ។ បើតាមក្រុមគ្រូពេទ្យរួមអាជីពឲ្យដឹងដែរថាអ្នកគ្រូពេទ្យ អ៉ឹម ស្រីនិ បានឆ្លងជំងឺកូវីដ១៩ ក្នុងនោះដំបូងបានព្យាបាលនៅមន្ទីរពេទ្យបង្អែកខេត្តព្រះសីហនុ ប៉ុន្តែដោយសារស្ថានភាពជំងឺធ្វើទុក្ខខ្លាំង គួបផ្សំនឹងមានជំងឺថ្លើមធ្ងន់ធ្ងរផង ក៏ត្រូវបានបញ្ជូនទៅព្យាបាលបន្ត នៅមណ្ឌលព្យាបាលជំងឺកូវីដ១៩ ព្រីមៀម សែនសុខ បានតែរយៈពេល២ថ្ងៃ អ្នកគ្រូពេទ្យរូបនេះបានក៏ទទួលមរណភាព ដោយសារស្ថានភាពជំងឺធ្ងន់ធ្ងរ មិនអាចជួយសង្គ្រោះបាន។
លោកជំទាវយក់ សម្បត្តិ រដ្ឋលេខាធិការក្រសួងសុខាភិបាលក៍មានប្រសាសន៍ប្រាប់បណ្តាញផ្សព្វផ្សាយ អំពីមរណភាពរបស់អ្នកគ្រូពេទ្យរូបនេះ ជាមួយនឹងការចូលរួមរំលែកទុក្ខជាមួយក្រុមគ្រួសារសពផងដែរ ហើយជាមួយគ្នានេះ លោកជំទាវ ពេជ ច័ន្ទមុនី ក្នុងនាមក្រុមប្រឹក្សាភិបាលសមាគម គ្រូពេទ្យស្ម័គ្រចិត្តយុវជនសម្តេចតេជោ រួមទាំងមិត្តភក្តិដែលជាគ្រូពេទ្យ បានបង្ហោះសារសម្តែងនូវការស្តោកស្តាយ ចំពោះការបាត់បង់អ្នកគ្រូពេទ្យឈ្មោះ អ៉ឹម ស្រីនិ និងចាត់ទុកមរណភាពនេះ គឺជាការលះបង់ដើម្បីជាតិ និងសូមឲ្យវិញ្ញាណក្ខន្ធអ្នកគ្រូពេទ្យ អ៉ឹម ស្រីនិ បានទៅកាន់សុខគតិភព កុំបីឃ្លៀងឃ្លាតឡើយ៕
