ខេត្តបាត់ដំបង! មន្ត្រីជំនាញបច្ចេកទេសនៃមន្ទីរកសិកម្មខេត្តបាត់ដំបង បានចុះណែនាំដល់កសិករឲ្យបានយល់ពីបទពិសោធន៍គ្រប់គ្រង និងការការពារផ្លែពុទ្រា កុំអោយសត្វរុយទិច និងដង្កូវចោះ និងទទួលបានទិន្នផលខ្ពស់។
លោក ស្រ៊ន សុខចាន់ ជាកសិករម្ចាស់ចម្ការពុទ្រារស់នៅក្នុងភូមិពាមឯក ឃុំពាមឯក ស្រុក ឯក ភ្នំ ខេត្ត បាត់ដំបង នៅថ្ងៃទី ២៥ ខែសីហា ឆ្នាំ ២០២១បានប្រាប់ឲ្យដឹងថា÷ បច្ចុប្បន្ននេះលោកបានដាំដំណាំពុទ្រាលេីផ្ទៃ ដីជាង ១រ៉ៃ ស្មើ ១៦០០ម៉ែត្រការ៉េ នៅឆ្នាំចុងក្រោយនេះបានជួបបញ្ហា ដំណាំពុទ្រារបស់លោកមិនអាចប្រមូលផលបាន ទាំងនេះដោយសារ សត្វរុយទិចផ្លែបំផ្លាញផ្លែ ដង្កូវ ចោះផ្លែ ហើយចុងក្រោយផ្លែពុទ្រាបានស្អុយជ្រុះពីដេីមតែម្តង។
កសិកររូបនេះបន្តថា÷ ការជ្រើសរើសដាំដុះដំណាំរុក្ខជាតិពុទ្រានេះឡើងដោយសារលោកបានសម្លឹងទីផ្សារផ្លែពុទ្រាមានហាងឆេងល្អ ម្យ៉ាងទៀតដោយសារលោកធ្លាប់ដាំកន្លងមក និងមានបទពិសោធន៍ខ្លះៗពីមុនមកទើបសម្រេចដាំរុក្ខជាតិនេះសម្រាប់ទ្រទ្រង់សេដ្ឋកិច្ចគ្រួសារ តែមិននឹកស្មានថារបរនេះចុងក្រោយមិនទទួលបានជោគជ័យសោះ។
នៅក្នុងការចុះណែនាំដល់កសិករម្ចាស់ចម្ការពុទ្រា លោក ឈឹម វជិរា ប្រធានមន្ទីរកសិកម្មរុក្ខាប្រមាញ់ និងនេសាទខេត្តបាត់ដំបងបានបញ្ជាក់ថា÷ រាល់ការជួបបញ្ហាផ្សេងៗលើការងារកសិកម្មបងប្អូនប្រជាកសិករសូមរាយការណ៍ព័ត៌មានឲ្យបានលឿនបំផុតទៅកាន់អាជ្ញាធរដែនដី មន្ត្រីជំនាញកសិកម្មស្រុក ឬអាចទំនាក់ទំនងទៅកាន់មន្ត្រីកសិកម្មខេត្ត និងតាមរយ:ផេកផ្លូវការរបស់មន្ទីរ ឬក្រសួងបាន ដើម្បីមន្ត្រីជំនាញចុះអន្តរាគមន៍ឲ្យបានលឿនទាន់ពេលវេលា។
ជាក់ស្តែងចំពោះកសិករដែលដាំដំណាំពុទ្រាខាងលើដោយសារតែមានការយ៉ឺតយ៉ាវក្នុងការជួបប្រឹក្សា អនុវត្តតាមការណែនាំពីមន្ត្រីជំនាញទើបធ្វើឲ្យដើមពុទ្រាមិនហុចផលបានល្អតាមការគ្រោងទុក ព្រោះ រាល់ការដាំដុះដំណាំនានាចាំបាច់ត្រូវអនុវត្តតាមបច្ចេកទេស ដូចជាការប្រើប្រាស់ជីធម្មជាតិទ្រាប់បាត ជីកំប៉ុស ថ្នាំកម្ចាត់សត្វល្អិតធម្មជាតិ ការស្រោចទឹក ជីធម្មជាតិបំប៉នតាមដំណាក់កាលលូតលាស់ ផ្កាផ្លែ ជាដើម។
ដោយឡែកចំពោះវិធានការការពាររុយចោះផ្លែពុទ្ទ្រាកសិករគប្បីអនុវត្តនូវវិធីសាស្ត្រសំអាតចំការឱ្យបានស្អាតល្អ, ប្រើស្បៃដើម្បីគ្របការពារនៅពេលផ្លៃចាប់ផ្តើមក្តិប បើមានលទ្ធភាព, អាចបាញ់ថ្នាំកម្ចាត់សត្វល្អិតដែលមានសារធាតុ Thaimethoxam, Lamda-cyhalothrin រឺ Spinosad បាញ់នៅដំណាក់កាលផ្លែក្តិប ឬមុនផ្លែចាស់ត្រូវទុករយះពេលរងចាំក្រោយការបាញ់ថ្នាំយ៉ាងហោចណាស់ ៧ ទៅ ១០ថ្ងៃ, ត្រូវប្រើអន្ទាក់ដើម្បីចាប់រុយពេញវ័យដែលមានសារធាតុ Methyl eugenol និង cue lure ដោយលាយជាមួយថ្នាំកម្ចាត់សត្វដែលមានសារធាតុ cypermetrin ឬ Fipronil ដើម្បីសម្លាប់រុយចោះផ្លែពេលវាចូលក្នុងអន្ទាក់នោះជាដើម នោះអាចធ្វើឲ្យមិនមានឧបសគ្គដល់ការលូតលាស់ផ្កា ផ្លែ របស់ដំណាំ ហើយហុចទិន្នផលល្អគាប់ប្រសើរផងដែរ៕
