(ប៉ៃលិន)តាមប្រភពពី លោក គ្រុយ សារិត ជាម្ចាស់កសិដ្ឋានចិញ្ចឹមឃ្មុំធម្មជាតិ ភ្នំខៀវប៉ៃលិន ស្ថិតក្នុងភូមិ សង្កាត់ ក្រុងប៉ៃលិន ខេត្តប៉ៃលិន បានឲ្យភ្នាក់ងារយើងដឹងនៅថ្ងៃទី២៥ខែសីហាឆ្នាំ២០២១នេះថា លោកបានឆ្លងកាត់ការយកចិត្តទុកដាក់នូវបទពិសោធន៍ជាក់ស្តែងក្នុងការចិញ្ចឹមឃ្មុំ រយៈពេលជាង៣ឆ្នាំកន្លងមកនេះ កសិដ្ឋានចិញ្ចឹមឃ្មុំរបស់លោកត្រូវបានអតិថិជនគាំទ្រកម្ម៉ង់ទិញ ដូរទាំងទឹមឃ្មុំ និងពូជឃ្មុំជាច្រើនម៉ឺនក្បាល ធ្វើឲកសិដ្ឋានចិញ្ចឹមឃ្មុំរបស់លោករកចំណូលបាន ផាត់ថ្លៃដើមចេញបានប្រមាណពី ១៥ ទៅ ២០ លានរៀលក្នុង១ខែៗ។ ដំបូងឡើយ សិដ្ឋានចិញ្ចឹមឃ្មុំនេះ មានធុងឃ្មុំត្រឹមតែ១០ ប៉ុណ្ណោះ ។
ក្រោយមក ដោយសារការខិតខំរៀនសូត្រនូវបច្ចេកទេស និងបទពិសោធន៍ជាក់ស្ដែងជាបន្តបន្ទាប់មក ធ្វើឱ្យគុណភាព និងលទ្ធផលនៃការបង្កាត់កម្មករឃ្មុំ និងស្តេចឃ្មុំ មានកំណើនទ្វេរឡើង ធ្វើឲ្យកសិដ្ឋានចិញ្ចឹមឃ្មុំ របស់គាត់បង្កើនពង្រីកវិសាលភាពបានច្រើនជាបន្តបន្ទាប់។
នាពេលបច្ចុប្បន្នជំងឺកូវីដ-១៩ បានបន្តយាយី ដល់ប្រជាពលរដ្ឋគួរឲព្រួយបារម្មណ៍ តែមិនបានប៉ះពាល់ដល់ការលក់ដូរទឹកឃ្មុំ ឬមេពូជឃ្មុំឡើយ ដោយមានអតិថិជនជិតឆ្ងាយបានកម្ម៉ង់ទិញជាហូរហែមិនដាច់ឡើយដោយអតិថិជន បាន ប្រាប់ថាអាចព្យាបាលជំងឺផ្តាសាយបានមួយកម្រិតដែរ។
ជាមួយនិងការលក់មេពូជឃ្មុំលោកបានផ្តល់សេចក្តីជឿជាក់ដល់កសិករដទៃទៀតដែលមានបំណងចង់ចិញ្ជឹមឃ្មុំនេះថា កសិដ្ឋានរបស់លោកបានជួយផ្ដល់នូវការប្រឹក្សាអំពីបច្ចេកទេសនៃការចិញ្ចឹមឃ្មុំ ដោយចាប់តាំងពីដើមដៃ រហូតដល់ពេលប្រមូលផលដោយមិនលាក់លៀមបច្ចេកទេសនោះឡើយ ។
ការលក់ទឹកឃ្មុំ ក្នុង១លីត្រ តម្លៃ៧០០០០រៀល ជាទឹកឃ្មុំសុទ្ធគាប ចេញពីសំបុកឃ្មុំ ដែលខ្លួនចិញ្ចឹម ដាក់ឱ្យក្រេបផ្កាដំណាំផ្សេងៗ ដើម្បីផលិតជាទឹកឃ្មុំ ដោយសហការជាមួយ នឹងម្ចាស់ចំការ ព្រោះបើសិនជាចំការណាមួយ មានសត្វឃ្មុំ ចូលទៅក្រេបផ្កា យកលំអងកាន់តែច្រើន ដំណាំទាំងនោះ នឹងបង្កើនផលផ្លែកាន់តែច្រើន ព្រោះសត្វឃ្មុំ ជាអ្នកផ្តល់ប្រយោជន៍។ តែអ្វីដែលគាត់ព្រួយបារម្ភបំផុតនោះ គឺពេលដឹកសំបុកឃ្មុំយកទៅដាក់ឱ្យក្រេបផ្កានៅចំការកសិករណាម្នាក់ លុះអ្នកចំការនៅក្បែរនោះ អត់ដឹង បាញ់ថ្នាំពុល លុះឃ្មុំហើរទៅក្រេបផ្កា ក៏ពុលងាប់អស់ជាច្រើន បណ្តាលឱ្យខាតបង់ផងដែរ ។
នៅពេលក្រោយនេះលោកនឹងពង្រីកសំបុកឃ្មុំ បន្ថែមទៀត ឱ្យបានច្រើនសំបុកបន្តទៀត ដើម្បីយកទៅដាក់នៅតាមចំការប្រជាពលរដ្ឋផង និងទុកលក់ជូនកសិករផង។ចំពោះការចិញ្ចឹមសត្វឃ្មុំនេះ ក៏ត្រូវមានការប្រុងប្រយ័ត្នផងដែរ ក្នុងការបើកគម្របសំបុក ដោយត្រូវប្រើសំលៀកបំពាក់ ឬប្រើផ្សែងបាញ់ឱ្យចំសំបុកវា ទើបមិនទិចម្ចាស់។
ពាក់ព័ន្ធការចិញ្ចឹមសត្វឃ្មុំនេះដែរ លោក ឡាយ ពិសិដ្ឋ នាយរងខណ្ឌរដ្ឋបាលព្រៃឈើ នៃមន្ទីរកសិកម្ម រុក្ខាប្រមាញ់ និងនេសាទ ខេត្តប៉ៃលិន បានឲ្យដឹងថាកសិករចិញ្ចឹមឃ្មុំ នៅខេត្តប៉ៃលិននេះមាន អ្នកចិញ្ចឹមច្រើនគួរសមដែរ ដោយសារខេត្តប៉ៃលិនអំណោយផលច្រើនក្នុងកាចិញ្ចឹមឃ្មុំ ដោយមាចំការឈើហូបផ្លែច្រើន មៀនប៉ៃលិន ស្វាយកែវរមៀត កៅស៊ូ ពោត ដំឡូង ។ល។
ចំពោះទីផ្សារក៍មានតម្រូវការខ្ពស់ព្រោះ តម្លៃគួរសម ព្រោះបរិបទកូវីដ ប្រជាពលរដ្ឋត្រូវការច្រើនដើម្បីទប់ស្កាត់ និងការពារសុខភាព។ តែកសិករចិញ្ចឹមឃ្មុំទាំងនោះ មិនបានមកចុះបញ្ជីការនៅខាងរដ្ឋបាលព្រៃឈើនៅឡើយ ។កន្លងមកខណ្ឌរដ្ឋបាលព្រៃឈើ នៃមន្ទីរកសិកកម្ម រុក្ខាប្រមាញ់ និងនេសាទខេត្តប៉ៃលិន ក្រោមកម្មវិធីអាស្បាយ បានផ្តល់វគ្គបណ្តុះបណ្តាលពីបច្ចេកទេសនៃការចិញ្ចឹមឃ្មុំ ដល់បណ្តុំអាជីវកម្មចិញ្ចឹមឃ្មុំចំនួនពីរ បណ្តុំអាជីវកម្មចិញ្ចឹមឃ្មុំសហគមន៍ព្រៃឈើភ្នំស្រង់ និងភ្នំដោះក្រមុំ ស្ថិតក្នុងឃុំស្ទឹងកាច់ ស្រុកសាលាក្រៅ ខេត្តប៉ៃលិន មុននឹងចែកទុនសហវិនិយោគម ដោយក្នុង១បណ្តុំទទួលបានពូជឃ្មុំ ១៧ធុង (មួយធុង៨ផ្លិត) និងសម្ភារសម្រាប់ចិញ្ចឹមឃ្មុំមួយចំនួនទៀត ហើយក្នុងមួយបណ្តុំ មានសមាជិក ៤០គ្រួសារ ។ ចំពោះកសិដ្ឋានចិញ្ចឹមឃ្មុំធម្មជាតិ ភ្នំខៀវប៉ៃលិន បានស្នើសុំចុះបញ្ជីការពីរដ្ឋបាលព្រៃឈើថ្នាក់កណ្តាល៕
