ខេត្តបាត់ដំបង! ក្រូចពោធិ៍សាត់អ្នកភូមិអូរខ្ជាយ បានចាប់ផ្ដើមប្រមូលផលជាបណ្តើរៗហើយ ដោយក្នុងតម្លៃថេរ បើធៀបទៅនឹងឆ្នាំកន្លងទៅ។
លោក ថូរ ជាប្រជាកសិករដាំដំណាំក្រូចពោធិ៍សាត់ រស់នៅចំណុចភូមិអូរខ្ជាយ ឃុំវត្តតាមិម ស្រុកសង្កែ នៃខេត្តបាត់ដំបង បានរៀបរាប់អោយអ្នកយកព័ត៌មានយើងដឹងនៅរសៀលថ្ងៃទី ០៩ ខែសីហា ឆ្នាំ២០២១នេះថា បច្ចុប្បន្នដំណាំក្រូចពោធិ៍សាត់របស់លោកមានចំនួន ៦៥០ដើម នៅលើផ្ទៃដីជាងកន្លះហិកតា ចំពោះការដាំវិញដំបូងឡើយគឺយើងគ្រាន់តែសាកបំបៅមែកអោយដុះរ៉ឺសរួចកាត់យកមកផ្សាំរយះពេល២០ថ្ងៃយើងយកមកដាំនឹងថែទាំដាក់ទឹកដាក់ជីជាការស្រេច។
ផលលំបាកនៃការដាំដំណាំក្រូចពោធិ៍សាត់ ការដាំដុះមួយឆ្នាំ មួយឆ្នាំកន្លះដំបូង គឺយើងជួបការលំបាកនិងចំណាយទុនច្រើនបន្តិចដែរ ព្រោះយើងត្រូវការថែទាំដោយដាក់ទឹកដាក់ជីជាប្រចាំ ដែលក្នុងមួយឆ្នាំចំណាយមិនក្រោមពី ១០០០ដុល្លារនោះទេ លុះដល់ឆ្នាំទីពីរទើបយើងកាត់បន្ថយការចំណាយរហូតដល់បីឆ្នាំទៅបីឆ្នាំកន្លះក្រូចចាប់រៀនផ្លែរនិងបួនឆ្នាំទៅប្រាំឆ្នាំទើបទទួលបានផលពេញជាហូរហែ។
ចំពោះតម្លៃទីផ្សារវិញ ក្នុង០១ផ្លូនយើងអាចលក់បានជាមធ្យមក្នុងតម្លៃចាប់ពី០៥ម៉ឺននិងចុះមកក្រោមបន្តិចបន្តួច ព្រោះក្រូចវាមានផ្លែរលេខ១ លេខ២ លេខ៣ តាមហ្នឹងដែរដែលតម្លៃនេះថេរបើធៀបនឹងឆ្នាំកន្លងទៅ បើទោះបីជាប្រទេសជាតិយើងកំពុងជួបវិបត្តិនៃជំងឺកូវីដ១៩ក៏ពិតមែន ប៉ុន្តែវាក៏មិនបានធ្វើអោយប៉ះពាល់ដល់តម្លៃក្រូចពោធិ៍សាត់នោះទេ ព្រោះមនុស្សយើងត្រូវការហូបចុកជាប្រចាំដែលមិនអាចអត់បាន។
ម្ចាស់ចំការក្រូចដដែលបានបញ្ជាក់ថា ចំពោះក្រូចពោធិ៍សាត់អ្នកភូមិអូរខ្ជាយ ជាទូទៅគេចាប់ផ្តើមប្រមូលផលពីដើមខែ០៨ និងអស់ទៅវិញនៅដើមខែ១០ ហើយផុតពីខែ១០ទៅវាមានតិចតួច ដែលគេហៅថាក្រូចតំណក់ទឹកភ្លៀង។