ខេត្តបាត់ដំបង! ជនជាតិអណ្ឌូនេស៊ី០១នាក់ក្នុងចំណោមប័ក្សពួកគ្នា០២នាក់ត្រូវបានកម្លាំងការិយាល័យនគរបាលអន្តោប្រវេសន៍ខេត្តបាត់ដំបងរៀបចំសំណុំបែបបទនិងបញ្ជូនទៅកាន់ អគ្គនាយកដ្ឋានអន្តោប្រវេសន៍ក្រសួងមហាផ្ទៃដើម្បីចាត់ការតាមផ្លូវច្បាប់ ក្រោយពិនិត្យឃើញថារូបគេបានឆ្លងដែនចូលមកប្រទេសកម្ពុជាដោយខុសច្បាប់ ។
យោងតាមមន្ត្រីការិយាល័យនគរបាលអន្តោប្រវេសន៍ នៃស្នងការនគរបាលខេត្តបាត់ដំបងបានបញ្ជាក់ឲ្យដឹងនៅថ្ងៃទី ២៦ ខែកក្កដា ឆ្នាំ ២០២១នេះ កម្លាំងការិយាល័យជំនាញបានរៀបចំបញ្ជូន ជនបរទេសជាជនជាតិអណ្ឌូនេស៊ីចំនួន ០១នាក់អនុវត្តតាមនីតិវិធី ដោយក្នុងនោះម្នាក់មានផ្ទុកជំងឺកូវីដ-១៩ ត្រូវបញ្ជូនទៅកាន់មណ្ឌលព្យាបាលក្នុងស្រុកសង្កែ និងម្នាក់ទៀតអវិជ្ជមានត្រូវនគរបាលទទួលបន្ទុកបានរៀបចំបញ្ជូនទៅអគ្គនាយកដ្ឋានអន្តប្រវេសន៍ក្រសួងមហាផ្ទៃ ដើម្បីអនុវត្តតាមនីតិវិធីពាក់ព័ន្ធករណីឆ្លងដែនចូលមកប្រទេសកម្ពុជាដោយខុសច្បាប់។
ជនបរទេសខាងលើមានឈ្មោះ TO LY ភេទប្រុស អាយុ ៣៨ឆ្នាំ និងម្នាក់ទៀតឈ្មោះ HAL TONO ភេទប្រុស អាយុ ៣១ឆ្នាំ អ្នកទាំងពីរជាជនជាតិឥណ្ឌូនេស៊ី បានឆ្លងដែនចូលមកប្រទេសកម្ពុជាដោយខុសច្បាប់(មិនមានលិខិតឆ្លងដែនត្រឹមត្រូវ)។
នគរបាលបន្ថែមថា÷ បុរសជនជាតិអណ្ឌូនេស៊ីទាំង ០២នាក់ខាងលើនៅថ្ងៃទី ២៥ ខែមិថុនា ឆ្នាំ ២០២១ បានធ្វើដំណើរដោយថ្មើជើងពីប៉ោយប៉ែតឆ្ពោះទៅកាន់ទីក្រុងភ្នំពេញ លុះមកដល់ស្រុកថ្មគោលនគរបាលបានសាកសួរទើបដឹងថាពួកគេមិនមានឯកសារត្រឹមត្រូវតាមច្បាប់ ហើយបានចេញពីតំបន់ប្រឈមក៏នាំខ្លួនទៅធ្វើចត្តាឡីស័ក ក្រោយមកអ្នកទាំងពីរនេះបានលួចចេញពីមណ្ឌលចត្តាឡីស័កនៅថ្ងៃទី ២៨ ខែមិថុនា ឆ្នាំ ២០២១ ទើបសមត្ថកិច្ចស្រាវជ្រាវឃាត់ខ្លួនបានមកវិញនៅក្នុងភូមិសាស្ត្រស្រុកសង្កែ។
ក្រោយការឃាត់ខ្លួនមកវិញនេះគ្រូពេទ្យបានធ្វើតេស្តជាថ្មីបានរកឃើញឈ្មោះHAL TONO វិជ្ជមានជំងឺកូវីដ-១៩ ក៏ត្រូវក្រុមគ្រូពេទ្យនាំខ្លួនទៅព្យាបាល ចំណែកម្នាក់ទៀតធ្វើចត្តាឡីស័កគ្រប់រយៈពេលកំណត់ និងមិនមានពាក់ព័ន្ធករណីកូវីដ-១៩ ទើបបញ្ជូនមកការិយាល័យជំនាញស៊ើបអង្កេត និងបានរៀបចំឯកសារបញ្ជូនទៅកាន់អគ្គនាយកដ្ឋានអន្តោប្រវេសន៍ក្រសួងមហាផ្ទៃតែម្តងដើម្បីអនុវត្តបន្តតាមនីតិវិធី៕
