(ខេត្តបាត់ដំបង) ទីតាំងល្បែងស៊ីសងបៀរ និងល្បែងភ្នាល់មាន់ជល់តាមទូរទស្សន៍នៅស្រុកកំរៀង នៅតែបន្តបើកលេងជួបជុំយ៉ាងពពាក់ពពូនដោយមិនខ្វល់ពីការឆ្លងរីករាលដាលនៃជំងឺកូវិដ.១៩ ខណៈដែលខេត្តបាត់ដំបងកំពុងបន្តរកឃើញអ្នកឆ្លងថ្មីកើនឡើងជារៀងរាល់ថ្ងៃគួរអោយព្រួយបារម្ភ។
ប្រជាពលរដ្ឋបានបង្ហើបប្រាប់អោយដឹងថា ទីតាំងលេងល្បែងស៊ីសងនៅស្រុកកំរៀងមួយនេះ ភាគច្រើនគឺពួកគាត់ប្រមូលផ្តុំគ្នាលេងនៅតាមតូបកាហ្វេ ហើយកន្លែងដែលបើកលេងទ្រង់ទ្រាយធំជាងគេ ដោយមិនខ្លាចសមត្ថកិច្ចនោះគឺនៅជិតផ្សារ KRD ហៅផ្សារកំរៀង ស្ថិតនៅក្នុងភូមិស្វាយធំ ឃុំបឹងរាំង ស្រុកកំរៀង ខេត្តបាត់ដំបង។
ប្រជាពលរដ្ឋបានឲ្យដឹងទៀតថា ល្បែងស៊ីសង បៀរ និងល្បែងភ្នាល់ជល់មាន់តាមអនឡាញនៅតាមតូបកាហ្វេក្នុងស្រុកកំរៀងនេះ មានការបើកប្រមូលផ្តុំគ្នាលេងយូរខែឆ្នាំមកហើយ ប៉ុន្តែមិនដែលឃើញមានសមត្ថកិច្ចចុះធ្វើការបង្ក្រាបឡើយ បើទោះបីដឹងថាពេលនេះប្រទេសជាតិកំពុងជួបវិបត្តិជំងឺឆ្លងកូវីដ១៩ ហើយត្រូវបានក្រសួងសុខាភិបាល ពិសេសប្រមុខរាជរដ្ឋាភិបាល បាននិងកំពុងដាក់វិធានការជាច្រើនក្នុងការបង្ការទប់ស្កាត់ការឆ្លងរាលដាលជំងឺដ៏កាចសាហាវមួយនេះ ម្យ៉ាងវិញទៀតការបើកល្បែងស៊ីសង វាផ្ទុយពីគោលការអនុវត្តគោលនយោបាយភូមិឃុំមានសុវត្ថិភាពទាំង៩ចំណុចរបស់រាជរដ្ឋាភិបាល ដើម្បីសុខសុវត្ថិភាពនិងរស់នៅគ្មានការភ័យខ្លាចសំរាប់សង្គមជាតិ។
ពាក់ព័ន្ធករណីខាងលើនេះដែរ លោក វេ គឹមចត់ អធិការនគរបាលស្រុកកំរៀងដែលទើបទទួលតំណែងថ្មី លោកបានឆ្លើយតបមកខាងសារព័ត៌មានយើងតាមរយះទំនាក់ទំនងទូរស័ព្ទ នៅថ្ងៃទី២៦ ខែកក្កដា ឆ្នាំ២០២១នេះថា លោកទទួលស្គាល់ថាមានល្បែងស៊ីសងកើតនៅចំណុចខាងលើនោះមែន តែខាងសមត្ថកិច្ចធ្លាប់ចុះទៅធ្វើកិច្ចសន្យាជាច្រើនលើកដែរតែនៅមិនព្រមឈប់ ហើយលោកសន្យាថានឹងចុះទៅពិនិត្យមើលម្តងទៀត៕
