ខេត្តបាត់ដំបង! សាកសពស្ត្រីម្នាក់ត្រូវបានពលរដ្ឋប្រទះឃើញអណ្តែតទឹកក្នុងស្ទឹងសង្កែ សង្ស័យជាករណីស្រវឹងស្រាហែលទឹកលេងបណ្តាលឲ្យលង់ស្លាប់។
ហេតុការណ៍ប្រទះឃើញសាកសពស្ត្រីលង់ទឹកស្លាប់ខាងលើនេះបានបង្កការភ្ញាក់ផ្អើលនៅព្រឹកថ្ងៃទី ១៤ ខែកក្កដា ឆ្នាំ ២០២១ នៅត្រង់ចំណុចខាងមុខវេទិការអុំទូក ស្ថិតក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង។
សាកសពស្ត្រីរងគ្រោះឋិតក្នុងសភាពអាក្រាតអត់ខោ ត្រូវបានគេស្គាល់ថាឈ្មោះ ដា អាយុ ប្រហែលជិត ៤០ឆ្នាំ រស់នៅក្នុងរ៉ាជង្រុក ស្ថិតក្នុងភូមិទួលតាឯក សង្កាត់ទួលតាឯក ក្រុងបាត់ដំបង ខេត្តបាតដំបង។
ប្រភពពីអ្នកជិតខាងបានអោយដឹងថា ជនរងគ្រោះឧស្សាហ៍ស្រវឹងស្រាជាញឹកញាប់ ហើយពេលស្រវឹងស្រាម្តងៗតែងតែរករឿងឈ្លោះនឹងប្តី ហើយបានព្យាយាមលោតទឹកសម្លាប់ខ្លួនម្តងដែរតែត្រូវបានគេជួយទាន់ លុះ២ខែចុងក្រោយមកដោយសារប្តីស៊ូទ្រាំនឹងការរករឿងពីប្រពន្ធមិនបានក៏បែកផ្លូវគ្នារហូតដល់ថ្ងៃកើតហេតុតែម្តង។
ប្រភពប្រជាពលរដ្ឋដែលធ្លាប់ស្គាល់នារីរងគ្រោះបានបញ្ជាក់ថា÷ កាលពីល្ងាចថ្ងៃទី ១៣ ខែកក្កដា កន្លងមកគេបានឃើញជនរងគ្រោះចុះងូតទឹកស្ទឹង និងបោកខោអាវ នៅក្បែរគល់ស្ពានសម្តេចក្រឡាហោម ស ខេង លុះបោកខោអាវរួច សង្ស័យស្រវឹងស្រាផង ស្ត្រីខាងលើបានហែលទឹកលេងលុះដល់កណ្តាលស្ទឹងក៏អស់កម្លាំងស្រែកឲ្យគេឯងជួយរួចបានលិចទៅក្នុងទឹកបាត់តែម្តង រហូតព្រឹកឡើងទើបអ្នកហាត់ប្រាណប្រទះឃើញសាកសពអណ្តែតឡើងតែម្តង។
ភ្លាមៗសមត្ថកិច្ចជំនាញបានចុះទៅពិនិត្យ រួចសម្រេចដឹកសាកសពយកតម្កល់ទុកនៅឯវត្តបច្ឆាដើម្បីស្វែងរកសាច់ញាតិយកទៅធ្វើបុណ្យតាមប្រពៃណី៕