ប៉ៃលិន ៖ ឯកឧត្តម សៅ សារ៉ាត់ អ្នកតំណាងរាស្ត្រមណ្ឌលប៉ៃលិន បានដឹកនាំមន្ទ្រីជំនាញនៃមន្ទីរកសិកម្មខេត្ត ចុះពិនិត្យមើលសត្វល្អិតចង្រៃស៊ីបំផ្លាញដំឡូងមីរបស់ប្រជាកសិករប្រមាណ ១៨០ហិកតា នៃផ្ទៃដីសរុបប្រមាណ ៤០០ហិកតា ដែលរងផលប៉ះពាល់ចំនួន ០២ភូមិគឺនៅភូមិអូរខ្ទីង និងភូមិអូរប្រើស ដែលស្ថិតនៅសង្កាត់អូរតាវ៉ៅ ខេត្តប៉ៃលិននាថ្ងៃទី០៦ ខែ មិថុនា ឆ្នាំ២០២០។
ឯកឧត្តម សៅ សារ៉ាត់ អ្នកតំណាងរាស្ត្រមណ្ឌលប៉ៃលិន បានមានប្រសាសន៍ថា៖ ក្រោយទទួលដំណឹង អំពីបញ្ហាសត្វល្អិតចង្រៃបានបំផ្លាញដំណាំដំឡូងមីរបស់បងប្អូនប្រជាពលរដ្ឋនៅសង្កាត់អូរតាវ៉ៅដែលមានបរិមាណច្រើនហិកតាភ្លាម បានដឹកនាំមន្ត្រីជំនាញនៃមន្ទីរកសិកម្មខេត្តនិងក្រុមការងារអ្នកជំនាញ ចុះពិនិត្យមើលដល់ទីតាំងចម្ការសង្កេតឃើញថាមានការខូចខាតហួសពីការស្មានរហូតដល់ ១៨០ហិកតា នៃផ្ទៃដីសរុប៤០០ហិកតា ក្នុងភូមិសាស្ត្រភូមិអូរខ្ទីងនិងភូមិអូរប្រើស សង្កាត់អូរតាវ៉ៅនេះ ហើយយើងនឹងត្រូវអោយមន្ត្រីជំនាញចុះមកសិក្សាបន្ថែមទៀតដើម្បីទប់ស្កាត់កុំអោយមានការខូចជាងនេះ។
ឯកឧត្តមក៏បានណែនាំដល់មន្ត្រីជំនាញពាក់ព័ន្ធត្រូវតាមជាប្រចាំនៅបញ្ហាកសិផលរបស់ប្រជាពលរដ្ឋតាមមូលដ្ឋាន ហើយអាជ្ញាធរគ្រប់លំដាប់ថ្នាក់ក៏ត្រូវចូលរួមរាយការណ៍និងសហការជាមួយមន្ត្រីជំនាញកសិកម្មអោយបាន ច្បាស់លាស់ ដើម្បីធ្វើយ៉ាងណាដោះស្រាយបានទាន់ពេលវេលា។
ក្នុងឱកាសនោះដែរ ឯកឧត្តមអ្នកតំណាងរាស្ត្រក៏បានធ្វើការប្រគល់ថ្នាំសំលាប់ពីងពាងក្រហមដែលបំផ្លាញដំណាំដំឡូងមីនេះដល់ ប្រជាកសិករផងដែរ។
លោក ផាន សុផាន់ណារ៉ា មន្ត្រីជំនាញនៃមន្ទីរកសិកម្មខេត្តបានពន្យល់ពីមូលហេតុដែលបណ្តាលឱ្យកើតមានសត្វល្អិតចង្រៃ ដូចជាសត្វចៃពីងពាង្គក្រហម និងសត្វចៃពណ៌សស៊ីបំផ្លាញដំណាំដំឡូងមីនេះ គឺបណ្តាលមកពីអាកាសធាតុក្តៅភាពរាំងស្ងួតអូសបន្លាយពេលយូរ ដូច្នេះបងប្អូនត្រូវតែប្រញ៉ាប់បាញ់ថ្នាំដើម្បីកម្ចាត់វា ហើយ បន្ទាប់មកយើងប្រើជី ដើម្បីបំប៉ន់ដំណាំដំឡូងមីរបស់យើងឱ្យលូតលាស់ល្អឡើងវិញ តែនោះវាអាស្រ័យលើទឹកភ្លៀង ផងដែរ។
ជាមួយគ្នានោះតាមការប៉ាន់ស្មានមកទល់ពេលនេះ ផ្ទៃដីផលិតកម្មដំណាំដំឡូងមីនៅខេត្តប៉ៃលិន មានប្រមាណ ១២៩០ហិកតា កំពុងទទួលរងផលប៉ះពាល់ពីសំណាក់សមាសភាពចង្រៃទទួលរងការបំផ្លាញដោយពីងពាងក្រហមមួយនេះ៕