កាណាដា៖ ក្រុមមន្ត្រីកាណាដា កាលពីថ្ងៃព្រហស្បតិ៍ បាននិយាយ ថា ភ្លើងឆេះព្រៃបានឆេះបំផ្លាញភូមិមួយអស់ប្រហែល ៩០% នៃទំហំភូមិទាំងមូល បន្ទាប់ពីសីតុណ្ហភាព បានឡើងខ្ពស់បំផុតមិនធ្លាប់មាន ក្នុងប្រទេសកាណាដា។
ភ្លើងឆេះព្រៃ បានបង្កការខូចខាតយ៉ាងធ្ងន់ធ្ងរទៅដល់ភូមិ លីតតុន (Lytton) ដែលស្ថិតនៅក្នុងខេត្ត ប្រីតធីស ខូឡុំប៊ី (British Columbia) និងហេដ្ឋារចនាសម្ព័ន្ធសំខាន់ៗជុំវិញនោះ។ មេភូមិ លីតតុន (Lytton) បាននិយាយថា៖ "គ្មានអ្វីនៅសេសសល់ច្រើនទេនៅក្នុងភូមិនេះ។ ភ្លើង បានឆេះនៅគ្រប់ទីកន្លែងទាំងអស់"។ មេភូមិនេះបានបញ្ជាក់ថា គាត់បានបញ្ជាឱ្យពលរដ្ឋភៀសខ្លួន និងបាននិយាយថា អណ្តាតភ្លើងបានឆេះរាលដាលពេញក្នុងភូមិក្នុងរយៈពេលត្រឹមតែ ១៥នាទីប៉ុណ្ណោះ។
អ្នកភូមិ បានភៀសខ្លួនចេញកាលពីថ្ងៃព្រហស្បតិ៍ ទី១ ខែកក្កដា ដោយភាគច្រើនមិនបានយករបស់របរអ្វីទៅជាមួយទេ នៅពេលដែលភ្លើង បានចាប់ផ្ដើមឆេះបំផ្លាញ ភូមិ លីតតុន (Lytton) ដែលមានពលរដ្ឋរស់នៅប្រហែល ២៥០នាក់ និងដែលមានចម្ងាយប្រមាណ ២៦០គីឡូម៉ែត្រពីទីក្រុង វេនខូវ័រ (Vancouver)។
ភូមិ លីតតុន (Lytton) នៅក្នុងសប្តាហ៍នេះ មានសីតុណ្ហភាពឡើងខ្ពស់បំផុតមិនធ្លាប់មាន ក្នុងប្រទេសកាណាដាគឺរហូតដល់ទៅ ៤៩,៦ អង្សាសេ។
សីតុណ្ហភាពឡើងខ្ពស់ខុសប្រក្រតី បានកើតមាននៅក្នុងផ្នែកជាច្រើននៃតំបន់អាមេរិកខាងជើងក្នុងសប្ដាហ៍នេះ។ ខេត្ត ប្រីតធីស ខូឡុំប៊ី (British Columbia) ដែលស្ថិតនៅភាគខាងលិចប្រទេសកាណាដា មានអ្នកស្លាប់ចំនួន ៤៨៦នាក់ក្នុងរយៈពេល ៥ថ្ងៃកន្លងមក ដោយសាររលកកម្ដៅ៕
