បាត់ដំបង៖ ស្ពានអូរតាគី ជាទីកន្លែងលក់កណ្តុរអាំង មានរស់ជាតិឈ្ងុយឆ្ងាញ់ដ៏ល្បីមួយសម្រាប់ប្រជាពលរដ្ឋនៅ ក្នុងខេត្ត បាត់ដំបង និង អ្នកធ្វើដំណើរឆ្លងកាត់ ទិញយកទៅទទួលទាន ឬអង្គុយញ៉ាំផ្ទាល់នៅទីនេះ ។
បច្ចុប្បន្ននេះកណ្តុរអាំងអូរតាគី ដែលមានចម្ងាយប្រហែល៥គីឡូម៉ែត្រប៉ុណ្ណោះពីក្រុងបាត់ដំបង នៅតែពេញនិយម សម្រាប់ភ្ញៀវក្នុងខេត្តនិងអ្នកធ្វើដំណើរឆ្លងកាត់ទិញទទួលទានជាប្រចាំ បើទោះបីជាខេត្តបាត់ដំបង កំពុង ប្រឈមមុខនឹងជំងឺកូវីដ-១៩ ដូចបណ្តាខេត្តនានាក្តី។
លោក ហាន តុង ប្រកបមុខរប អាំងកណ្តុរលក់ ជាង ១០ឆ្នាំ នៅក្បែរស្ពានអូរតាគី ស្ថិតក្នុងភូមិអូរតាគី ឃុំអូរតាគី ស្រុកថ្មគោល ខេត្តបាត់ដំបង រៀបរាប់ថា បច្ចប្បុន្ននេះ សម្បូរអ្នកនិយមបរិភោគកណ្តុរអាំងគួរសម ដោយក្នុងមួយថ្ងៃ លោកលក់ប្រមាណ ២០គីឡូក្រាម ។ លោកថា តម្លៃលក់ឲ្យអតិថិជន គឺលក់គិតជាក្បាលទៅតាមទំហំតូចឬធំ ដោយតម្លៃចាប់ពីមួយក្បាល់ ៥០០រៀល រហូតដល់ មួយក្បាល ៦០០០រៀល ។
នៅអូរតាគីមានលក់សត្វកណ្តុរអាំងជាច្រើនកន្លែង និង មានកញ្ចុះលើទឹកសម្រាប់ភ្ញៀវអង្គុយទទួលទាន និងជិះអង្រឹង ស្រូបខ្សល់អាកាសបរិសុទ្ធផងដែរ ។
អ្នកលក់កណ្តុរនៅទីនេះបាន និយាយថា កណ្តុរដែលដាក់អាំងលក់រាល់ថ្ងៃមិនចេះដាច់នេះគឺកណ្តុរធម្មជាតិសុទ្ធសាធ គឺពួកគាត់បានទិញតពីអ្នកភូមិ ដែលដើរដាក់ អន្ទាក់ឬអង្គប់តាមស្រែ នៅពេលយប់ លុះព្រឹកឡើងអ្នក ភូមិយកមកលក់ឲ្យដល់កន្លែងតែម្តង ។
អ្នកលក់កណ្តុរខាងលើបញ្ជាក់ថា កណ្តរដែលមានរស់ជាតិកាន់តែឆ្ងាញ់ គឺរដូវប្រាំ វាសម្បូរខ្លាញ់ ព្រោះកណ្តុរស៊ីស្រូវ ចំពោះរដូវវស្សាកណ្តុរស៊ីខ្យងក្តាម មិនសូវ មានខ្លាញ់ដូចខែប្រាំងនោះទេ។
ការអាំងកណ្តុរ ដើម្បីឱ្យមានរស់ជាតិឆ្ងាញ់ ក្រហមល្អ លោកថា យើងត្រូវប្រឡាក់គ្រឿង ខ្លះ ហើយអាំង រយៈពេល ប្រហែល ២ម៉ោងទើបឆ្អិនល្អ «យើងប្រឡាក់គ្រឿង ដូចជារ៉ូតឌី ហើយយកមកប្រឡាក់ ធម្មតាកណ្តុរយកទៅអាំងវាក្រហមស្រាប់» ។
លោក ហាន តុង បាននិយាយថា ក្រៅពីលក់ឲ្យភ្ញៀវដែលមកទទួលទានផ្ទាល់ និងវេចខ្ចប់លោកក៏លក់បោះឱ្យម៉ូយ តាម ហាងខ្លះផងដែរ ដូចជា នៅខាងភ្នំសំពៅ ជាដើម ។ ទោះបីយ៉ាងណា ខណៈដែលប្រទេសយើងកំពុង ប្រឈមនឹងជំងឺកូវីដ-១៩ ក៏វាបានប៉ះពាល់ខ្លះដែរដល់មុខរបរលក់កណ្តុររបស់គាត់ ពីព្រោះបច្ចុប្បន្ននេះ មិនសូវមានអ្នកធ្វើដំណើរ ឆ្លងកាត់ច្រើនដូចមុន នោះទេ ធ្វើឲ្យការលក់កណ្តុរអាំងរបស់លោកថយចុះ ដោយពីមុនលោកលក់ក្នុងមួយថ្ងៃរហូតដល់៥០គីឡូក្រាម ឯណោះ។
ទោះយ៉ាងណា លោក ហាន តុង សូមជម្រាបដល់អ្នកនិយមទទួលទាន កណ្តុរអាំងទាំងអស់ថា ប្រសិនបើចង់ភ្លក់រស់ជាតិ កណ្តុរអាំងរស់ជាតិឆ្ងាញ់ អាំងក្តៅៗ កុំភ្លេចកណ្តុរអាំង ក្បែរស្ពានអូរតាគី ។
សូមបញ្ជាក់ថា ការអាំងកណ្តុរលក់ ក្នុងខេត្តបាត់ដំបង ក្រៅពីមានទីតាំងស្ថិតនៅក្បែរស្ពានអូរតាគី ស្រុកថ្មគោល គឺមានទីតាំងផ្សេងៗទៀត ដូចជា តាមដងផ្លូវ ទៅរមណីយដ្ឋានភ្នំសំពៅ និង តាមផ្លូវជាតិលេខ៥ ក្នុងស្រុកសង្កែជាដើម ៕ ក្រសួងព័ត៌មាន
