សៀមរាប៖ការទទូចសុំអោយអាជ្ញាធរជួយទប់ស្កាត់នេះធ្វើឡើងក្នុងកិច្ចសម្ភាសន៍មួយ នាព្រឹកថ្ងៃទី២១ខែ មិថុនាឆ្នាំ២០២១នៅក្រុងសៀមរាប បន្ទាប់ពីក្រុមឈ្មួញដីឡូត៍បានឃុបឃិតគ្នាទិញលក់ដីកប់ខ្មោច (ផ្នូរខ្មោច)គ្រីស្ទាន។
លោកប្រាក់ វុទ្ធី ស្ថាបនិករបស់សមាគមសពគ្រីស្ទាន និងជាប្រធានសមាគមគ្រូគង្វាលប្រចាំខេត្ត សៀមរាប បានផ្តល់បទសម្ភាសន៍ថា ដីផ្នូខ្មោចឬកប់ ខ្មោច ដែលត្រូវបានគេឃុបឃិតគ្នាទិញលក់ ឈូសឆាយបោះបង្គោលធ្វើជាដីឡូត៍នេះ ស្ថិតក្នុងភូមិបុស្សក្រឡាញ់ សង្កាត់ជ្រាវ ក្រុងសៀមរាប មានទំហ៊ំ៥០ គុណ១០០ម៉ែត្រ ដោយពួកគេឃុបឃិតគ្នាលក់ទិញ ក្នុងតម្លៃជាង១០ម៉ឺនដុល្លារ។
លោកបន្តថា ដីនេះកាលពីអំឡុងឆ្នាំ២០០៤ អង្គការ វិហារមេថីឌីស កម្ពុជា បានប្រគល់អោយសមាគមសពគ្រីស្ទាន ទុកសម្រាប់កប់សព ហើយបន្តគ្រប់គ្រងមកទល់បច្ចុប្បន្ន ។ តែថ្មីៗនេះមានបុគ្គលមួយក្រុមតូចឃុបឃិតគ្នាទិញលក់ដីនេះពុះជាដីឡូត៍ ទើបខាងលោកសម្រេចរៀបចំដាក់ពាក្យបណ្តឹង។
លោកប្រាក់ វុទ្ធី បញ្ជាក់ថា ពេលនេះលោកកំពុងដំណើរការបណ្តឹងទៅថ្នាក់ក្រុងនិងខេត្ត ដើម្បីរំលាយការទិញលក់ហើយរក្សាដីនេះអោយសមាគមគ្រប់គ្រងកប់សពគ្រីស្ទានវិញ។ តែក្នុងពេលកំពុងដំណើរការ បណ្តឹង ក្រុមជនឃុបឃិតលូចបន្តឈូសឆាយនិងបោះបង្គោល ហេតុដូច្នេះហើយទើបរូប លោកទទូចសុំអោយអាជ្ញាធរជួយទប់ស្កាត់បែបនេះ។ត្បិតបណ្តឹង របស់លោក អាចនឹងឈានដល់តុលាការ។
សូមបញ្ជាក់ថា កាលពីថ្ងៃទី១៥ខែមិថុនាឆ្នាំ ២០២១កន្លងទៅនេះ លោក ក្អោប រ៉ន ចៅសង្កាត់ជ្រាវ បានថ្លែងថា ករណីនេះលោកនៅមិនទាន់ដឹងច្បាស់ដែរ។
ប៉ុន្តែលោក នួន ពុទ្ធារ៉ា អភិបាលក្រុងសៀមរាប បានបញ្ជាក់តាមទូរសព្ទ័ថា រាល់ការឈូសឆាយពុះជាដីឡូត៍ត្រូវមានលិខិតកាន់កាប់ដី និងច្បាប់អនុញាតិត្រឹមត្រូវ។ មិនចឹងទេគឺខុសច្បាប់។ តែបើដីខាងលើនៅជាប់ពាក់ពន្ធ័និងសមាគម ខាងសមាគមអាចមកដាក់ ពាក្យនៅសាលាក្រុងបាន។
លោកបន្តថា ថ្វីត្បិតអាជ្ញាធរក្រុងមិនទាន់បានចុះ ទៅពិនិត្យទីតាំងដីនោះពិតមែន តែបើពិនិត្យឃើញ ថាដីនោះស្ថិតក្រោមការគ្រប់គ្រង របស់អាជ្ញាធរបឹង ទន្លេ សាប សាលាក្រុងមិនអនុញាតិច្បាប់ឡើយ។
លោកប្រាក់ វុទ្ធី បញ្ជាក់ចុងក្រោយថា ដីដែលខាងលោកកំពុងដំណើរការប្តឹងនេះ ក្រៅពីសម្រាប់កប់សពគ្រីស្ទាន វាក៍ស្ថិតក្នុងដែនគរប់គ្រងរបស់អាជ្ញាធរបឹង ទន្លេសាបផងដែរ ហេតុដូច្នេះការឃុបឃិតគ្នាទិញលក់ពិតជាល្មើសច្បាប់៕ ដោយ តាំង ហូ
