បាត់ដំបង! បុរសវ័យចំណាស់ម្នាក់ទៀតហើយបានស្លាប់ដោយសារជំងឺកូវីដ-១៩នៅក្នុងខេត្តបាត់ដំបង នាំឲ្យចំនួនសរុបអ្នកស្លាប់កើនឡើងដល់០៣នាក់ដោយសារជំងឺកូវីដ-១៩។
ប្រភពព័ត៌មានពីមន្ត្រីសុខាភិបាលបានបញ្ជាក់ឲ្យដឹងថា÷ នៅថ្ងៃទី ១៤ ខែមិថុនា ឆ្នាំ ២០២១នេះមានអ្នកជំងឺកូវីដ-១៩ ម្នាក់ទៀតបានស្លាប់កាលពីអំឡុងវេលាម៉ោង ៣និង៣០នាទីរសៀល អ្នកជំងឺដែលបានស្លាប់ទី ១ដោយសារកើតជំងឺកូវីដ-១៩ បូករួមទាំងមានជំងឺប្រចាំកាយមួយចំនួនផងដែរទើបធ្ងន់ធ្ងរមិនអាចជួយសង្គ្រោះជីវិតបាន។
ជនរងគ្រោះស្លាប់មានឈ្មោះ អុិត ហ៊ុម ភេទប្រុស អាយុ ៧៧ឆ្នាំរស់នៅក្នុងភូមិបោះពោធិ៍ ឃុំអូរដំបង១ ស្រុកសង្កែ ខេត្តបាត់ដំបង។
នៅថ្ងៃដដែលនេះដែរក្នុងភូមិសាស្ត្រខេត្តបាត់ដំបង ក្រុមគ្រូពេទ្យសមរភូមិជួរមុខបានរកឃើញប្រជាពលរដ្ឋឆ្លងនូវជំងឺកូវីដ-១៩ ចំនួន ១១នាក់ ជាករណីក្នុងព្រឹត្តិការណ៍ ២០ កុម្ភ: មានចំនួន ៦នាក់ និងករណីពលករខ្មែរនាំចូលចំនួន ៥នាក់។
គិតត្រឹមថ្ងៃទី ១៤ ខែមិថុនា ឆ្នាំ ២០២១ រដ្ឋបាលខេត្តបាត់ដំបងបានបង្ហាញទូរលេខប្រជាពលរដ្ឋវិជ្ជមានជំងឺកូវីដ-១៩ សរុបចំនួន ៥៤២នាក់ បានព្យាបាលជាសះស្បើយចំនួន ២៣២នាក់ កំពុងសម្រាកព្យាបាលចំនួន ៣០៨នាក់ និងករណីស្លាប់កើនដល់ចំនួន ៣នាក់៕