ខេត្តបាត់ដំបង! យ៉ាងហោចណាស់ស្ត្រីម្នាក់បានស្លាប់ភ្លាមៗ និងបុរសជាប្តីនិងកូនម្នាក់រងរបួសធ្ងន់ស្រាល នៅក្នុងហេតុការណ៍គ្រោះថ្នាក់ចរាចរណ៍ក្រឡាប់រថយន្តដែលបង្ករឡើងដោយខ្លួនឯង។
លោកវរសេនីយ៍ទោ សេង លុច អធិការនគរបាលស្រុកថ្មគោល បានអោយដឹងថា ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងនៅវេលាម៉ោង ២១និង៤៥នាទី ថ្ងៃទី០៧ ខែ មិថុនា ឆ្នាំ២០២១ នៅតាមបណ្តោយផ្លូវជាតិលេខ០៥ កំពុងស្ថាបនា ស្ថិតត្រង់ចំណុចក្រុមទី១៥ ភូមិអូរតាគី ឃុំអូរតាគី ស្រុកថ្មគោល ខេត្តបាត់ដំបង ។
ប្រភពនៅកន្លែងកើតហេតុបានប្រាប់ថា នៅមុនពេលកើតហេតុគេឃើញរថយន្តដឹកទំនិញធុនធ្ងន់ម៉ាកហ្វ៊ុយសូ(FUSO) ពណ៍ទឹកប្រាក់ ស៊េរី២០០២ មួយគ្រឿង ពាក់ស្លាកលេខ បាត់ដំបង 3A-4022 បើកបរក្នុងទិសដៅពីជើងទៅត្បូងក្នុងល្បឿនយ៉ាងលឿន លុះមកដល់ចំណុចកើតហេតុផ្លូវវាងទៅទ្រូងផ្លូវខាងលិច បានបួងចង្កូតមិនទាន់ក៍ជ្រុលបុកខឿនទ្រូងផ្លូវ បណ្តាលឱ្យក្រឡាប់ខូចខាតទាំងរថយន្តនិងរនាំងដែកទ្រូងផ្លូវយ៉ាងដំណំ ហើយអ្នកបើកបរឈ្មោះ សុខ ចាន់ ភេទប្រុស អាយុ៣៨ឆ្នាំ រងរបួសស្រាល និងអ្នករួមដំណើរពីរនាក់ឈ្មោះ ដុស សុធា ភេទស្រី អាយុ៤២ឆ្នាំ ជាប្រពន្ធ(ស្លាប់) និងឈ្មោះ ចាន់ សុខហេង ភេទប្រុស អាយុ១៣ឆ្នាំ (រងរបួសធ្ងន់) ទាំងបីនាក់រស់នៅភូមិសំរោងតាកុក ឃុំសំរោងក្នុង ស្រុកឯកភ្នំ ខេត្តបាត់ដំបង។
ក្រោយពេលកើតហេតុសមត្ថកិច្ចជំនាញបានចុះទៅដឹកបញ្ជូនជនរងគ្រោះទៅសង្គ្រោះព្យាបាលនៅមន្ទីរពេទ្យ ចំណែកសាកសពត្រូវបានប្រគល់អោយខាងសាច់ញាតិយកទៅរៀបចំធ្វើបុណ្យតាមប្រពៃណី ដោយឡែករថយន្តក្រោធ្វើគំនូសហេតុរួចបានស្ទូចយកទៅរក្សាទុកនៅការិយាល័យនគរបាលចរាចរណ៍ផ្លូវគោកខេត្តដើម្បីចាត់ការតាមនីតិវិធី ។
