(ខេត្តបាត់ដំបង)៖ ក្រោយផ្លូវដែកសម្ពោធបើកដាក់ឱ្យដំណើរការជាថ្មី គេសង្កេត ឃើញភ្ញៀវទេសចរជាតិនិងអន្តរជាតិនៅតែបន្តនាំគ្នាសម្រុកទៅជិះឡូរីបានកើនឡើងដែលក្នុងមួយថ្ងៃៗមានចំនួនរាប់រយនាក់។
បងប្រុស ផា គារ ជាអ្នករត់រ៉ឺម៉កម៉ូតូកង់បី ដឹកភ្ញៀវម្នាក់ បានប្រាប់ឱ្យដឹងនៅរសៀលថ្ងៃទី២៨ ខែកក្កដា ឆ្នាំ២០១៩ នេះថា ក្រោយពីផ្លូវដែកសម្ពោធបើកដាក់ឱ្យដំណើរការជាថ្មីភ្ញៀវទេសចរជាតិ និងអន្តរជាតិ ចំនួនរាប់រយនាក់ដែលក្នុងមួយថ្ងៃៗ បានបង្វែរពីការជិះឡូរីទេសចរជើងភ្នំបាណន់ នាំគ្នាសម្រុកមកជិះឡូរី នៅចំណុចរ៉ាអូរដំបង ស្ថិតក្នុងឃុំអូរដំបង២ ស្រុកសង្កែ នៃខេត្តបាត់ដំបង មានការកើនឡើង។
លោកបន្តថា មូលហេតុដែលធ្វើឱ្យក្រុមភ្ញៀវវិលត្រឡប់ពីការជិះឡូរីទេសចរជើងភ្នំបាណន់ មកជិះឡូរី នៅខាងរ៉ាអូរដំបងវិញ ដោយសារតែពួកគាត់គិតថា ឡូរីទេសចរណ៍ជើងភ្នំបាណន់ជាឡូរីអ្នកមាន ចំណែកឡូរីនៅរ៉ាអូរដំបង ជាឡូរីអ្នកក្រ ទើបពួកគាត់នាំគ្នាមកជិះនៅទីនេះដើម្បីជួយដល់ពលរដ្ឋក្រីក្រច្រើននាក់ឱ្យមានការងារធ្វើ និងមានប្រាក់ចំណូលខ្លះយកទៅផ្គត់ផ្គង់ជីវភាពក្នុងគ្រួសារ និងមួយវិញទៀតវានៅក្បែរទីក្រុងងាយស្រួលក្នុងការធ្វើដំណើរ ដោយមិនចំណាយពេលវេលាយូរ។
លោកបន្តថាឡូរីដឹកភ្ញៀវទេសចររ៉ាអូរដំបង មានទីតាំងនៅឃុំអូរដំបង២ ស្ថិតក្នុងស្រុកសង្កែ ខេត្តបាត់ដំបង ធ្វើដំណើរចេញពីចំណុចក្នុងរ៉ាអូរដំបង ឆ្ពោះទៅចំណុចគោលដៅរ៉ាអូរស្រឡៅ ដែលមានចម្ងាយផ្ទៃដី ប្រមាណជា ១៤គីឡូម៉ែត្រគិតទាំងទៅទាំងមក និងតម្លៃក្នុងភ្ញៀវម្នាក់ចំនួន៥ដុល្លារ។
គួរបញ្ជាក់ផងដែរថា បើយោងតាមរបាយការណ៍របស់លោក នួន ថា អនុប្រធានមន្ទីរទេសចរណ៍ខេត្តបាត់ដំបងបានឱ្យដឹងថា ក្នុងឆមាសទី១ ឆ្នាំ២០១៩ ភ្ញៀវទេសចរចូលមកកម្សាន្តលេងក្នុងតំបន់គោលដៅទេសចរណ៍នានាសម្រាប់ខេត្តបាត់ដំបងមានចំនួន ៣៤០,២៧៩នាក់ កើនឡើង ២.១៩% បើធៀបទៅនឹងឆមាសទី១ នៅឆ្នាំ២០១៨ មានត្រឹម ៣៣២,៩៨៨នាក់ (ក្នុងនោះភ្ញៀវជាតិចំនួន ២៨៨,៨៩៣នាក់ កើនឡើង ២.៤៥%) និង(ភ្ញៀវអន្តរជាតិចំនួន ៥១,៣៨៦នាក់ កើនឡើង ៧៨%)៕