ខេត្តបាត់ដំបង!ជនសង្ស័យម្នាក់ ត្រូវបានកម្លាំងជំនាញនៃអធិការដ្ឋាននគរបាលស្រុកគាស់ក្រឡ ចុះស្រាវជ្រាវឃាត់ខ្លួនបានភ្លាមៗ ក្រោយពីធ្វើសកម្មភាពលួចគោយន្តកន្ត្រៃយ៍មួយគ្រឿងបើកគេចខ្លួនចេញពីក្នុងទឹកដីនៃស្រុកបាណន់។
លោកវរសេនីយ៍ឯក ប៉ាង ហៀង អធិការនគរបាលស្រុកគាស់ក្រឡ បានបញ្ជាក់អោយដឹងថា ក្រោយទទួលបានសេចក្តីរាយការណ៍ពីសមត្ថកិច្ចស្រុកបាណន់ ថាមានករណីជនមិនស្គាល់មុខបានធ្វើសកម្មភាពលួចយកគោយន្តកន្ត្រៃមួយគ្រឿងចេញពីភូមិសាស្ត្ររបស់ខ្លួនដែលមានព្រំប្រទល់ជាប់គ្នា ភ្លាមនោះលោកបានចាត់អោយកម្លាំងដែលឈរជើងនៅតាមគោលដៅមួយចំនួនឃ្លាំមើល និងមួយចំនួនទៀតចុះរុករកតាមភូមិ រហូតកំណត់បានមុខសញ្ញានិងបានធ្វើការឃាត់ខ្លួនតែម្តង។
ដែលការឃាត់ខ្លួននេះដែរធ្វើឡើងនៅល្ងាចថ្ងៃទី ៣០ ខែឧសភា ឆ្នាំ ២០២១ នៅក្នុងភូមិសាស្ត្រឃុំឆ្នាល់មាន់ ស្រុកគាស់ក្រឡ ខណ:ដែលជនសង្ស័យជាមុខសញ្ញាកំពុងធ្វើដំណើរឆ្លងចូលទឹកដីស្រុកគាស់ក្រឡ ជាប់ព្រំប្រទល់របស់ស្រុកបាណន់ ខេត្តបាត់ដំបង។
ជនសង្ស័យត្រូវបានឃាត់ខ្លួន ឈ្មោះ រុណ សារៀង ភេទប្រុស អាយុជិត ២០ឆ្នាំ រស់នៅចំណុចភូមិសសរពក ឃុំកន្ទី១ ស្រុកបាណន់ ដែលជនសង្ស័យខាងលើ នៅព្រឹកកើតហេតុថ្ងៃទី ៣០ ខែឧសភា ខណ:មានឱកាសល្អក៏ធ្វើសកម្មភាពលួចគោយន្ត ហើយក៏គេចខ្លួនរហូតឆ្លងចូលទឹកដីស្រុកគាស់ក្រឡត្រូវនគរបាលមូលដ្ឋានស្ទាក់ឃាត់ខ្លួនបានតែម្តង។
ក្រោយពីឃាត់ខ្លួនសមត្ថកិច្ចដកហូតវត្ថុតាងគោយន្តកន្ត្រៃយ៍ចំនួនមួយគ្រឿងនិងមានសណ្តោងរឺម៉កផងដែរ ក្រោយមកក៏បានប្រគល់ទាំងជនសង្ស័យនិងវត្ថុតាងអោយទៅខាងអធិការដ្ឋាននគរបាលស្រុកបាណន់ដើម្បីអនុវត្តបន្តតាមនីតិវិធី៕
