ខេត្តបាត់ដំបង! ប្រភពព័ត៌មានចេញពីសមត្ថកិច្ចមូលដ្ឋាននិងប្រជាពលរដ្ឋបានអោយដឹងថា ត្រីជាច្រើនក្បាលបានងាប់អណ្តែតពេញផ្ទៃទឹកស្ទឹងថ្វាក(ស្ទឹងសង្កែ) ស្ថិតនៅស្រុករតមណ្ឌល ខេត្តបាត់ដំបង ដែលករណីនេះបណ្តាលមកពីសារធាតុជាតិពុល ពណ៌ក្រម៉ៅ ល្អក់ បានហូរពីប៉ែកខាងលើ ដែលចេញពីរោងចក្រចិនមួយ ។
មន្ត្រីមូលដ្ឋានដដែលបានអោយដឹងថា ត្រីដែលងាប់ក្នុងស្ទឹងថ្វាក ដែលហូរបន្តចូលស្ទឹងសង្កែប៉ែកខាងលើនេះ បានប៉ះពាល់ទៅលើឃុំចំនួន០៣ ដែលក្នុងនោះមានឃុំត្រែង ឃុំអណ្តើកហែប និង ឃុំផ្លូវមាស ស្រុករតនមណ្ឌលខេត្តបាត់ដំបង ហើយនេះជាលើកទីពីរហើយដែលជាតិពុលនេះបានហូរចេញពីរោងចក្រចិនមួយដែលកំពុងសាងសង់នៅប៉ែកខាងលើ បង្កអោយមានត្រីងាប់ និង ប៉ះពាល់ខ្លាំងដល់តំបន់ទេសចរណ៍ស្ទឹងថ្វាក ដែលមានអ្នកទេសចរណ៍ទៅលេងផង និងប៉ះពាល់ដល់ពលរដ្ឋដែលប្រើប្រាស់ទឹកស្ទឹងនេះផងដែរ។
លោក សន និល អធិការនគបាលស្រុករតនមណ្ឌលបានអោយដឹងនៅថ្ងៃទី២៧ ឧសភាខែ ឆ្នាំ២០២១នេះថា ក្រោយពីទទួលបានដំណឹងពាក់ព័ន្ធករណីខាងលើភ្លាម លោកនឹងអាជ្ញាធរឃុំបានចុះទៅកាន់ទីតាំងរោងចក្រចិនខាងលើដែល ឈ្មោះ វ៉ាកាង ដើម្បីត្រួតពិនិត្យ និងឃើញថាជាតិពុលនេះ បានហៀរចេញពីកន្លែងអាងស្តុកទឹកពណ៌លឿង នៃរោងចក្រចិននេះពិតប្រាកដមែន ដោយសារតែភ្លៀងខ្លាំងបានហូរច្រោះអាងនេះបណ្តាលអោយហៀរទឹកគីមីពុលចូលស្ទឹង។
លោកអធិការបានបញ្ជាក់ថាក្រោយពីចុះពិនិត្យលោកបានអោយម្ចាស់ទីតាំងរោងចក្រខាងលើនេះបិទកន្លែងធ្លាយចេញពីអាងស្តុកនេះរួចរាល់ហើយ មិនមានហូរជាតិពុលចេញមកទៀតនោះទេ និងបានណែនាំអោយម្ចាស់រោងចក្រនេះមានការប្រុងប្រយ័ត្ន បើមានលើកក្រោយទៀតនឹងរាយការណ៍ ជូនថ្នាក់លើដើម្បីចាត់ការតាមផ្លូវច្បាប់។
