កំពត៖ប្រជាកសិករមួយចំនួននៅក្នុងខេត្តកំពត បានផ្អាកការប្រមូលផលអំបិល ដោយសារតែអាកាសធាតុមិនអំណោយផលល្អ ដោយមានភ្លៀងធ្លាក់ជាញឹកញាប់។
លោក សុខ គឹមជឿន ប្រធានមន្ទីរឧស្សាហកម្មវិទ្យាសាស្ត្របច្ចេកវិទ្យា និងនវានុវត្តន៍ខេត្តកំពត បានមានប្រសាសន៍ឱ្យដឹងថា រហូតមកដល់ពេលនេះ ប្រជាពលរដ្ឋមួយចំនួននៅក្នុងខេត្តកំពត បានផ្អាកក្នុងការប្រមូលផលអំបិល ដោយសារតែមួយរយ:ពេលនេះ មានភ្លៀងធ្លាក់ជាញឹកញាប់ ដែលធ្វើឱ្យពួកគាត់ពិបាកក្នុងការប្រមូលផលអំបិល។ លោកបានបន្តថា ដោយសារតែកត្តាទាំងនេះហើយ ដែលធ្វើឱ្យពួកគាត់បានសម្រេចចិត្តក្នុងការផ្អាកប្រមូលផល ប៉ុន្តែក៏មានប្រជាពលរដ្ឋមួយចំនួនទៀត គាត់នៅតែរង់ចាំមើលស្ថានភាពអាកាសធាតុល្អប្រសើរឡើងវិញ ទើបបន្តប្រមូលផលបន្តទៀត។ លោកបានបន្តទៀតថា ចំពោះអំបិលដែលប្រមូលផលកន្លងមកបានចំនួនជាង៦ម៉ឺនតោន ដោយបូកជាមួយនិងអំបិលដែលសល់ពីក្នុងឃ្លាំងចាស់ សរុបសល់ជាង៧ម៉ឺនតោន សម្រាប់បន្តក្នុងការផ្គត់ផ្គង់តម្រូវការទីផ្សារ ។
លោកប្រធានមន្ទីរបានឱ្យដឹងទៀតថា ចំពោះតម្លៃទីផ្សារនាពេលបច្ចុប្បន្ននេះវិញ គឺអំបិល៥០គីឡូក្រាម ប្រភេទលេខ១ លក់បានក្នុងតម្លៃ ចន្លោះពី១២០០០រៀលទៅ១២៥០០រៀលប្រភេទលេខ២ តម្លៃ១០០០០រៀល និងប្រភេទលេខ៣ តម្លៃចន្លោះពី៨០០០ទៅ ៩០០០រៀល៕
ក្រសួងព័ត៌មាន
