យ៉ាងហោចណាស់ មនុស្ស១៤នាក់ បានស្លាប់ ក្នុងហេតុការណ៍ធ្លាក់រថយន្តខ្សែកាបនៅក្នុងសួនកម្សាន្ត Stresa-Mottarone ប្រទេសអ៊ីតាលី កាលពីថ្ងៃទី២៣ ឧសភា ចុងសប្តាហ៍ ម្សិលមិញនេះ។
លោកស្រី Marcella Severino អភិបាលក្រុង Stresa បានថ្លែងប្រាប់ហេតុការណ៍នេះ ទៅកាន់វិទ្យុ RAI ថា រថយន្តខ្សែកាបដែលផ្ទុកមនុស្ស១៥នាក់ បានចេញដំណើរពីបឹង Maggiore ឡើងទៅកំពូលភ្នំ Mottarone ដែលមានកម្ពស់ជិត១,៤០០ម៉ែត្រ ដោយប្រើពេល២០នាទី។ ស្រាប់តែរថយន្តខ្សែកាបនោះ ជួបបញ្ហាបច្ចេកទេស និងបានធ្លាក់នៅកម្ពស់ប្រមាណ២០ម៉ែត្រ។ ហើយរអិលចុះជម្រាលភ្នំជាច្រើនជុំ មុនពេលទាក់ជាប់នឹងដើមឈើ។
ជនរងគ្រោះមួយចំនួនត្រូវបានប្រទះឃើញជាប់នៅខាងក្នុងកាប៊ីនតែម្តង ខណៈអ្នកខ្លះទៀតបានខ្ទាតចូលទៅក្នុងព្រៃ។ បច្ចុប្បន្នអ្នកត្រួតពិនិត្យឈ្មោះបានចាប់ផ្តើមកំណត់អត្តសញ្ញាណជនរងគ្រោះ ដែលរួមមានជនបរទេស៕ Reuters