កែប៖ លោក សោម ចិន្តា ប្រធានមន្ទីរទេសចរណ៍ ខេត្តកែប បានឲ្យដឹងថា ក្នុងថ្ងៃឈប់សម្រាករយៈពេល៣ថ្ងៃនេះ ពោលគឺថ្ងៃឈប់សម្រាកបុណ្យចម្រើនព្រះជនព្រះមហាក្សត្រ និងថ្ងៃឈប់សម្រាកចុងសប្តាហ៍កន្លងទៅ ភ្ញៀវទេសចរដែលមកលេងកម្សាន្តនៅខេត្តកែប មានប្រមាណជាង ៤ពាន់នាក់ ដោយក្នុងនោះមានភាគច្រើនគឺភ្ញៀវជាតិ។
ថ្លែងប្រាប់ប្រព័ន្ធផ្សព្វផ្សាយក្នុងស្រុក នៅថ្ងៃទី១៧ ខែឧសភា ឆ្នាំ២០២១នេះថា លោកចាត់ទុកថា នេះជាចំនួនដ៏ច្រើននៃការដើរលេងកម្សាន្តរបស់ភ្ញៀវទេសចរមកកាន់ខេត្តកែប ក្នុងបរិបទនៃការរីករាលដាលនៃជំងឺកូវីដ១៩។
លោកប្រធានមន្ទីរបានបន្តថា យើងឃើញថាពេលនេះបងប្អូនប្រជាពលរដ្ឋ ដែលបានចេញធ្វើដំណើរកម្សាន្តមានការកើនឡើងបណ្តើរៗហើយ ជាពិសេសគឺមកលេងខេត្តដែលនៅជាប់តំបន់ឆ្នេរសមុទ្រនេះតែម្តង។ ដែលធ្វើឲ្យបងប្អូនអាជីវករប្រកបរបរលក់គ្រឿងសមុទ្រ មានការរីករាយជាងមុន ហើយការផ្គត់ផ្គង់គ្រឿងសមុទ្រទៅឲ្យភ្ញៀវទេសចរស្ទើរតែមិនគ្រប់តម្រូវការ ដោយសារបរិំមាណដែលអាជីវករយកមកទុកបម្រុងលក់មានចំនួនតិច គួបផ្សុំកត្តាអាកាសធាតុផងដែលធ្វើអ្នកនេសាទមួយចំនួនបានផ្អាកចេញទៅនេសាទរបស់ខ្លួន។
ជាមួយ នឹងបរិមាណនៃចំនួនភ្ញៀវទេសចរដែលមកលេងកម្សាន្តហាក់កំរើកឡើងវិញ ការបន្តការអនុវត្តនូវវិធានការសុខាភិបាល ក៏ដូចជាបំរាមនានារបស់រដ្ឋបាលខេត្តកែប ដែលបានដាក់ចេញកាលពីពេលកន្លងទៅ ក្នុងការទប់ស្កាត់ការឆ្លងជំងឺកូវីដ១៩ចូលក្នុងសហគមន៍ នៅតែបន្តអនុវត្តន៍យ៉ាងម៉ឺងម៉ាត់ ក៏ដូចជាការបំពាក់នូវប្រព័ន្ធស្កេន QR Code ស្វែករកមេរោគកូវីដ១៩ នៅតាមគោលដៅទេសចរណ៍សំខាន់ៗជាដើម។
ក្នុងនោះដែរកាលពីពេលថ្មីៗនេះ អភិបាលខេត្តកែប លោក សោម ពិសិដ្ឋ បានហាមមិនឲ្យមានការក្រាលកន្ទេលនៅតាមបណ្តោយឆ្នេរលេងទឹកទៀតនោះទេ នៅចន្លោះថ្ងៃ ច័ន្ទ និងថ្ងៃសុក្រតែអាជីវករនៅតែអាចក្រាលកន្ទេលបាន នៅថ្ងៃសៅរ៍ និងអាទិត្យ ដែលវិធានការនេះបានដាក់ចេញ កាលពីកំឡុងពេលប្រជុំឆ្លងផែនការអភិវឌ្ឍន៍វិស័យទេសចរណ៍នៅខេត្តកែប (២០២១ ២០២៥) កាលពីពេលកន្លងទៅ៕