ភ្នំពេញ៖ គម្រោងដោះលែងសត្វព្រៃក្នុងឧទ្យានអង្គរ ក្រោមកិច្ចសហការរវាងអាជ្ញាធរជាតិអប្សរា រដ្ឋបាល ព្រៃឈើភ្នំពេញ និងអង្គការ Wildlife Alliance នាថ្ងៃទី១៧ ខែឧសភា ឆ្នាំ២០២១ បានដឹកជញ្ជូនសត្វ ស្លាប៣ប្រភេទផ្សេងទៀតសរុបចំនួន ១១ក្បាល មកកាន់ព្រៃរមណីយដ្ឋានអង្គរ។ សត្វស្លាបទាំងនោះ រួមមាន សត្វក្ងោក (Peafowl) ចំនួន ៥ក្បាល សត្វកេងកងធំ (Great Hornbill) ចំនួន ៣ក្បាល និង សត្វព្វាំង (Wreathed Hornbill) ចំនួន ៣ក្បាល ដែលទទួលបានជាអំណោយពីអង្គការអភិរក្សសត្វ ព្រៃនានា និងប្រជាពលរដ្ឋ យកមកផ្សាំនៅក្នុងព្រៃរមណីយដ្ឋានអង្គរ ដែលក្រុមការងារគ្រោង នឹងធ្វើ ការដោះលែងសត្វស្លាបទាំងនេះ ចេញពីទ្រុងចូលទៅក្នុងព្រៃនាពេលខាងមុខ ។
កន្លងមក គម្រោងទទួលបានជោគជ័យក្នុងការដោះលែងសត្វព្រៃជាច្រើនប្រភេទ ចូលក្នុងព្រៃ ធម្មជាតិ នៃឧទ្យានអង្គរ មានដូចជាសត្វទោចមកុដ (Pileated gibbon) ចំនួន ១១ក្បាល (កើតកូន បានចំនួន ៤ក្បាល) សត្វឈ្លូស (Red muntjac) ចំនួន ៤ក្បាល សត្វស្វាព្រាម (Silvered langurs) ចំនួន ១២ក្បាល សត្វសំពោចក្រអូប (Common palm civets) ចំនួន ៥ក្បាល សត្វភេខ្លួនរលោង (Smooth-coated otter) ចំនួន ៤ក្បាល (កើតកូនបានចំនួន២ក្បាល) សត្វឆ្មារដាវ (Leopard Cat) ចំនួន ២ក្បាល និងសត្វកេងកងតូច (Oriental Pied Hornbill) ចំនួន ២ក្បាល និងសត្វផ្សេងៗមួយ ចំនួនទៀត។ មកដល់សព្វថ្ងៃសត្វទាំងអស់នេះ នៅតែមានវត្តមាននៅទីនោះនៅឡើយ ក្រោមការយក ចិត្តទុកដាក់តាមដាន និងថែទាំជាប្រចាំពីក្រុមការងារ។
ដើម្បីឲ្យសត្វព្រៃទាំងអស់ បន្តវត្តមាននៅក្នុងព្រៃធម្មជាតិ នៃឧទ្យានអង្គរយើង និងបង្កើនចំនួន បន្ថែមទៀត អាជ្ញាធរជាតិអប្សរា និងគម្រោងដោះលែងសត្វព្រៃក្នុងឧទ្យានអង្គរ បានអំពាវនាវជូន សាធារណជន ភ្ញៀវជាតិ អន្តរជាតិ ជាពិសេសប្រជាពលរដ្ឋដែលរស់នៅតំបន់នោះ ចូលរួមថែរក្សា សត្វព្រៃទាំងនោះទាំងអស់គ្នា ជៀសវាងពេលប្រទះឃើញមានបំណងមិនល្អ និងមេត្តាកុំផ្តល់ចំណីឲ្យ សត្វទាំងនោះ ៕
