(ខេត្តព្រះសីហនុ)៖ កូនគ្រែងឈាមតូចៗជិត៥តោន ប្រភេទ១គីឡូមានជាង៤ម៉ឺនគ្រាប់ត្រូវបានកម្លាំងកងរាជអាវុធហត្ថស្រុកព្រៃនប់សហការជាមួយកម្លាំងជំនាញជលផល ឃាត់ចាប់បាន ពីឈ្មួញដែលដឹកកូនគ្រែងឈាមនេះតាមរថយន្ត២គ្រឿងពីខេត្តកោះកុងឆ្លងកាត់ភូមិសាស្ត្រស្រុកព្រៃនប់ កាលពីវេលាម៉ោងជាង២រសៀលថ្ងៃទី១១ ឧសភា ២០២១ ។
លោកអនុសេនីយ៍ឯក ម៉ែន វណ្ណា មេបញ្ជាការស្តីទីមូលដ្ឋានកងរាជអាវុធហត្ថស្រុកព្រៃនប់ ដែលបានដឹកនាំកម្លាំងចុះសហការបង្ក្រាបផ្ទាល់ឲ្យដឹងថា ការបង្ក្រាបនេះធ្វើឡើងតាមបទបញ្ជាពីលោកឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ និងថាសកម្មភាពបង្ក្រាបនេះ ធ្វើឡើងក្នុងពេលដែលឈ្មួញដឹកជញ្ជូនកូនគ្រែងឈាមខុសច្បាប់ ប្រភេទតូចៗល្អិត១គីឡូប្រមាណជាជាង៤ម៉ឺនគ្រាប់នេះ ដឹកតាមរថយន្ត២គ្រឿងពីខេត្តកោះកុងឆ្លងកាត់ភូមិសាស្ត្រស្រុកព្រៃនប់ បម្រុងឆ្លងចូលទៅខេត្តកំពត សំដៅយកទៅលក់ឲ្យឈ្មួញនៅប្រទេសវៀតណាម ។
លោកអនុសេនីយ៍ឯកមេបញ្ជាការស្តីទីបានបន្ថែមថា ក្រោយឃាត់ចាប់ទាំងរថយន្ត និងកូនគ្រែងឈាមទាំងអស់ បានប្រគល់ជូនកម្លាំងជំនាញជលផល តាមនិតិវិធី ហើយក្រោយពីបានប្រគល់ជូនជំនាញរួច កូនគ្រែងឈាមទាំងអស់ ត្រូវបាននាំយកទៅលែងវិញភ្លាមៗដែរ នៅក្នុងដែនសហគមន៍នេសាទព្រៃនប់ពីរ ក្នុងស្រុកព្រៃនប់ខេត្តព្រះសីហនុ ។ ចំណែកឈ្មួញដែលពាក់ពន្ធ័នឹងការដឹកជញ្ជូនធ្វើជំនួញកូនគ្រែងឈាមខុសច្បាប់នេះ ខាងមន្ត្រីជលផលខេត្តព្រះសីហនុនិងចាត់ការបន្តតាមនិតិវិធីច្បាប់ ៕