អង្គការសម្ព័ន្ធមិត្តសត្វព្រៃ បានឲ្យដឹងថា នៅថ្ងៃទី១២ ខែឧសភា ម្សិលមិញ មន្ត្រីឧទ្យានុរក្ស បានជួយសង្គ្រោះ និងដោះលែងសត្វរញីប្រផេះមួយក្បាល នៅក្នុងតំបន់ជួរភ្នំក្រវាញ។ សត្វរញីផេះមួយក្បាលនេះ ត្រូវបានប្រទះឃើញ នៅក្នុងបាវរបស់អ្នកបរបាញ់ម្នាក់។
គួរបញ្ជាក់ថា រញី (Nycticebus bengalensis) ជាប្រភេទសត្វ កំពុងរងគ្រោះ និងទទួលរងការគំរាមកំហែង ដោយសារតែតម្រូវការ ផលិតជាឱសថបុរាណ និងពាណិជ្ជកម្មសត្វចិញ្ចឹមខុសច្បាប់។ សត្វសញីមួយក្បាលនេះ ទទួលបានសំណាង ហើយវានឹងបានឱកាសជាលើកទី២ ដើម្បីត្រឡប់ទៅរស់នៅក្នុងព្រៃវិញ។
សូមជម្រាបថា រញីប្រផេះ សម្បូរនៅប្រទេសកម្ពុជា ភូមា ថៃ ចិន និងឥណ្ឌូចិន។ ជាទូទៅវាមានពណ៌ផ្សេងៗគ្នា ចាប់ពីត្នោតប្រផេះព្រលែតទៅក្រហមត្នោត និងមានឆ្នូតពណ៌ត្នោតចាប់ពីក្បាលរហូតដល់ពាក់កណ្តាលខ្នង ឬដល់គល់កន្ទុយ និងមានលក្ខណៈស្រដៀងគ្នាទៅនឹងរញីភ្លើងដែរ។ វាមានពណ៌ត្នោតចាស់ពទ្ធ័ជុំវិញរង្វង់ភ្នែកទាំងពីរ និងមានរោមឆ្នូត ពណ៌សតាមបណ្តោយខ្ទង់ច្រមុះ។
វាជាសត្វរាត្រីចររស់នៅ និងរកស៊ីនៅពេលយប់នៅតាមដើមឈើតំបន់ព្រៃស្រោង ព្រៃពាក់កណ្តាលស្រោង និងអាចមានវត្តមាននៅតាមចម្ការផងដែរ។ អាហាររបស់វាមានសត្វល្អិត សត្វស្លាប និងផ្លែឈើ។ ជាសត្វចូលចិត្តរស់នៅឯកឯង ហើយធ្វើចលនាបំលាស់ទីយឺតៗមិនសូវរហ័សរហួនដូចសត្វដទៃ។ រញីប្រផេះអាចរស់នៅបានរហូតដល់អាយុ ១៤ឆ្នាំ៕