ខេត្តបាត់ដំបង! មានការភ្ញាក់ផ្អើលដល់មនុស្សរាប់រយនាក់ចោមរោមមើល ក្រោយក្មេងប្រុសជំទង់ ២នាក់ចុះងូតទឹកក្នុងរណ្តៅដីខ្នាតយក្សនិងមានជម្រៅជិត ១០ម៉ែត្របណ្តាលឲ្យលង់ស្លាប់យ៉ាងអាណោចអាធ័ម។
ហេតុការណ៍គួរអោយភ្ញាក់ផ្អើលនិងរន្ធត់ខាងលើនេះបានកើតឡើងនៅវេលាម៉ោងជាង ១២និង០០នាទី ថ្ងៃទី ១០ ខែឧសភា ឆ្នាំ ២០២១ ត្រង់ចំណុចរណ្តៅដីទើបជីកដ៏ធំនិងមានជម្រៅជ្រៅមួយកន្លែងស្ថិតនៅក្នុងភូមិអូរមុន្នី២ ឃុំអន្លង់វិល ស្រុកសង្កែ ខេត្តបាត់ដំបង។
ប្រភពពីពលរដ្ឋនៅក្បែរទីតាំងកើតហេតុបានបញ្ជាក់ថា÷ នៅមុនពេលកើតហេតុគេបានឃើញក្មេងជំទង់រងគ្រោះទាំង ២នាក់បានដើរលេងនិងចុះងូតទឹករណ្តៅដីធំ និងជ្រៅជម្រៅប្រមាណជា ១០ម៉ែត្រហើយក៏មិនមានអ្នកចាប់អារម្មណ៍ដោយស្មានថាពួកគេចេះហែលទឹក ហើយដោយបាត់យូរក្រោយពេលដែលម្តាយចេញមកពីធ្វើការពេលល្ងាចវិញក៏មិនឃើញកូនហើយបានដើររក ក្រោយមកក៏ប្រទះឃើញស្បែកជើងនិងសំលៀកបំពាក់មួយចំនួននៅក្បែរស្រះទឹកទើបដឹងថាក្រុមក្មេងបានលង់ទឹកក៏កើតមានការភ្ញាក់ផ្អើលឡើងតែម្តង។
ក្រោយមានការសង្ស័យថាក្មេងប្រុសទាំងពីរនាក់លង់ទឹក ភ្លាមនោះអ្នកស្រុកក៏ដូចជាសមត្ថកិច្ចបានចុះជួយអន្តរាគមន៍ជ្រមុជទឹករាវរកផង និងបង់សំណាញ់ផងអស់ជាច្រើនម៉ោងរហូតនៅវេលាម៉ោងជាង ៨និង០០នាទីយប់ ថ្ងៃដដែលទើបអាចរកឃើញ ដោយក្មេងរងគ្រោះទី០១ឈ្មោះ វី ភេទប្រុស អាយុ ១៣ និងទី០២ឈ្មោះ រ៉ា វីត ភេទប្រុស អាយុ ១២ឆ្នាំ ទាំងពីររស់នៅក្នុងភូមិអូរមុន្នី២ ឃុំអន្លង់វិល ស្រុកសង្កែ ហើយក្រោយពីពិនិត្យរួចរាល់សមត្ថកិច្ចមូលដ្ឋានបានប្រគល់សាកសពជនរងគ្រោះទៅឲ្យសាច់ញាតិដើម្បីរៀបចំធ្វើបុណ្យតាមប្រពៃណី។
គួរបញ្ជាក់ថា ខេត្តបាត់ដំបងរណ្តៅដីខ្នាតយក្សនិងមានជម្រៅជ្រៅ មានរាប់សិបរណ្តៅដែលក្រុមឈ្មួញបានធ្វើអាជីវកម្មកាយយកអាចម៌ដីលក់ដោយមិនខ្វល់ពីផលប៉ះពាល់អ្វីឡើយ ហើយបើយោងតាមច្បាប់នៃមន្ទីររ៉ែនិងថាមពលខេត្តបាត់ដំបង ការជីករណ្តៅដីទំហំមិនលើសពី០១ហិកតា និងជម្រៅមិនលើសពី ០៥ ម៉ែត្រនោះទេ តែជាក់ស្តែងរណ្តៅដីមួយកន្លែងដែលកំពុងកាយនៅខាងក្រោយវត្តអូរតាគី ស្ថិតក្នុងភូមិត្រស់ ឃុំអូរតាគី ស្រុកថ្មគោល ត្រូវបានឈ្មួញធ្វើអាជីវកម្មកាយអាចម៌ដីលក់ដោយមានទំហំធំ និងជម្រៅជ្រៅ ផ្ទុយទៅហ្នឹងការស្នើសុំគីគ្រាន់តែស្តាតអូរប៉ុណ្ណោះ។
