អ្នកស្លាប់ដោយសារជំងឺកូវីដ-១៩ នៅប្រទេសឥណ្ឌាមានចំនួនរហូត៣៧៨០នាក់ក្នុងរយៈពេល តែ២៤ម៉ោង បន្ទាប់ពីប្រទេសនេះបានក្លាយជាប្រទេសទី ២ ដែលមានអ្នកឆ្លងចំនួនលើសពី២០លាននាក់ បន្ទាប់ពីសហរដ្ឋអាមេរិក។នេះបើយោងតាមការចុះផ្សាយរបស់សារព័ត៌មានCNA នៅថ្ងៃទី០៥ ខែឧសភា ឆ្នាំ២០២១។
ទិន្នន័យក្រសួងសុខាភិបាលបានបង្ហាញថា ករណីឆ្លងប្រចាំថ្ងៃកើនឡើង ៣៨២៣១៥ នៅថ្ងៃពុធ ទី៥ ខែឧសភានេះ។ ការកើនឡើងករណីឆ្លងខ្លាំងនៅឥណ្ឌា ធ្វើឱ្យមន្ទីរពេទ្យអស់គ្រែ និងអុកស៊ីសែន ហើយកន្លែងបញ្ចុះសពពេញហៀរទៅដោយសាកសពអ្នកជំងឺ ខណៈដែលមនុស្សជាច្រើនបានស្លាប់ក្នុងរថយន្តសង្គ្រោះបន្ទាន់លើគ្រែពេទ្យ នៅពេលរងចាំអុកស៊ីសែន។
បណ្តាប្រទេសជាច្រើន បានបញ្ជូនជំនួយជាសម្ភារៈវេជ្ជសាស្ត្រ ទៅកាន់ប្រទេសឥណ្ឌា។ រដ្ឋាភិបាលឥណ្ឌានិយាយថា ការផ្គត់ផ្គង់អុកស៊ីសែនមានគ្រប់គ្រាន់ ប៉ុន្តែការចែកចាយត្រូវបានរារាំងដោយសារបញ្ហាដឹកជញ្ជូន៕