កសិករម្នាក់ត្រូវរន្ទះបាញ់បណ្តាលឲ្យស្លាប់ភ្លាមៗខណ:កំពុងដាក់ជីដំណាំក្នុងភូមិសាស្ត្រស្រុកកំរៀង
ខេត្តបាត់ដំបង! បុរសជាកសិករម្នាក់ត្រូវបានរន្ទះបាញ់បណ្តាលអោយខ្លោចរោលស្លាប់ភ្លាមៗនៅនឹងកន្លែងខណ:កំពុងដាក់ជីដំណាំស្របពេលដែលមេឃភ្លៀងរលឹមផ្សែងក្រូច។
លោក ស្រី វុឌ្ឍី អធិការនគរបាលស្តីទីស្រុកកំរៀងបានប្រាប់ឲ្យដឹងថា÷ ហេតុការណ៍គ្រោះធម្មជាតិដ៏អាក្រក់ខាងលើនេះបានកើតឡើងនៅល្ងាចថ្ងៃទី ២៨ ខែមេសា ឆ្នាំ២០២១ ក្នុងភូមិសាស្ត្រភូមិផ្លូវប្រាំមួយ ឃុំតាក្រី ស្រុកកំរៀង ខេត្តបាត់ដំបង។
ជនរងគ្រោះមានឈ្មោះ ផាត សៅធា ភេទប្រុស អាយុ ៣០ឆ្នាំ រស់នៅទីកន្លែងកើតហេតុខាងលើ ដែលមុនពេលកើតហេតុស្របពេលមេឃស្រទុំរលឹមតិចៗជនរងគ្រោះបានជិះម៉ូតូចេញពីផ្ទះដើម្បីទៅដាក់ជីដំណាំពោតនៅឯចម្ការ មិនយូរប៉ុន្មានគ្រាដែលកំពុងស្ពាយធុងស្ពេកត្រូដាក់ជីដើរក្នុងចម្ការក៏ស្រាប់តែរន្ទះបាញ់បណ្តាលឲ្យឆេះរោលខ្លោចស្លាប់នៅនឹងកន្លែងតែម្តងហើយត្រូវបានក្រុមគ្រួសារយករៀបចំធ្វើបុណ្យតាមប្រពៃណី។
គួរបញ្ជាក់ផងដែរថា!ចាប់តាំងពីដើមខែមេសា រហូតមកដល់ត្រឹមថ្ងៃទី២៨ ខែមេសា ឆ្នាំ ២០២១មកនេះ នៅក្នុងភូមិសាស្ត្រនៃខេត្តបាត់ដំបងគ្រោះធម្មជាតិរន្ទះបាញ់ បានបាញ់សម្លាប់មនុស្សប្រុសស្រីកើនដល់ចំនួន ៦នាក់ ខណ:សត្វពាហនៈជាង១០ក្បាលទៀតបានងាប់និងរបួសដោយសារគ្រោះធម្មជាតិមួយនេះ៕