អាល់កុលក្លែងក្លាយទាំង ៦៣០លីត្រនេះ ត្រូវបានមន្ត្រីជំនាញ ដកហូតពីអ្នកលក់រាយ និងអ្នកប្រើប្រាស់ ក្នុងស្រុកមេមត់ និងស្រុកពញាក្រែក។ កាលពីថ្ងៃទី២៦មេសា មន្ត្រីជំនាញ ក៏បានរកឃើញអាល់កុលក្លែងក្លាយ ៤៧០លីត្រ នៅខេត្តកំពង់ស្ពឺ និងនៅខេត្តព្រៃវែង។
មន្ត្រីសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» ខេត្តត្បូងឃ្មុំ បានចុះត្រួតពិនិត្យគុណភាពអាល់កុល កាលពីថ្ងៃអង្គារ ទី២៧ ខែមេសា ឆ្នាំ២០២១ នៅស្រុកមេមត់ និងស្រុកពញាក្រែក ដោយបានយកអាល់កុល ១១គំរូ ដើម្បីយកមកធ្វើតេស្តគុណភាព។
ក្រោយការធ្វើតេស្តរួច មន្ត្រីជំនាញសាខា ក.ប.ប. បានរកឃើញ និងរឹបអូសអាល់កុលសម្លាប់មេរោគក្លែងក្លាយ (មេតាណុល) ចំនួន ៦៣០ លីត្រ មករក្សាទុក ដើម្បីអនុវត្តនីតិវិធីបន្ត។
សូមរម្លឹកថា កាលពីថ្ងៃទី២៦ ខែមេសា ឆ្នាំ២០២១ មន្ដ្រីជំនាញសាខា ក.ប.ប. ដែលឈរជើងនៅតាមបណ្ដាខេត្តចំនួន ០៣ គឺខេត្តកំពងស្ពឺ ខេត្តព្រៃវែង និងខេត្តឧត្ដរមានជ័យ បានចុះត្រួតពិនិត្យគុណភាព និងអង្កេតតម្លៃទំនិញ នៅតាមបណ្ដាផ្សារ ដែលស្ថិតក្នុងភូមិសាស្ត្ររបស់ខ្លួន។
ជាលទ្ធផល មន្ត្រីជំនាញ បានរកឃើញអាល់កុលក្លែងក្លាយ ( មេតាណុល ) ចំនួន ៤៧០លីត្រ គឺនៅខេត្តកំពង់ស្ពឺ ២០ លីត្រ និងនៅខេត្តព្រៃវែង ចំនួន ៤៥០លីត្រ៕
