ខេត្តបាត់ដំបង៖ រដ្ឋបាលនៃខេត្តបាត់ដំបង បានចេញសម្រេចទាំងយប់ថ្ងៃទី២១ ខែមេសា ឆ្នាំ២០២១ ដោយបិទបណ្ដោះអាសន្ននូវភូមិខ្នាចអំពារ ឃុំព្រែកជីក ស្រុករុក្ខគិរី ខេត្តបាត់ដំបង បន្ទាប់ពីរកឃើញបុរសម្នាក់ ជាអ្នករកស៊ីដឹកម្នាស់លក់ទៅផ្សារនាគមាស ក្នុងរាជធានីភ្នំពេញ បានឆ្លងជំងឺកូវីដ-១៩ ពាក់ព័ន្ធក្នុងព្រឹត្តិការណ៍សហគមន៍២០កុម្ភៈ ដែលបុរសរូបនេះ រស់នៅក្នុងភូមិឃុំខាងលើ និងសាច់ញាតិ០៧នាក់ត្រូវយកសំណាកនិងដាក់ឲ្យធ្វើចត្តាឡីស័ក ហើយអាជ្ញាធរកំពុងស្វែងរកអ្នកពាក់ព័ន្ធបន្ថែមទៀត ។
លោក ស្រី ប៊ិន ប៉ូឡែន អភិបាលស្រុករុក្ខគីរីខេត្តបាត់ដំបង បានឲ្យដឹងថា បុរសឈ្មោះ យ៉ាន គឹមយ៉ា អាយុ២៧ឆ្នាំ រកស៊ីដឹកម្នាស់ពីស្រុករុក្ខគីរីទៅលក់នៅរាជធានីភ្នំពេញ ត្រូវបានមន្ត្រីសុខាភិបាលពិនិត្យរកឃើញថាមានវិជ្ជមានកូវីដ-១៩ កាលពីថ្ងៃទី២០ ខែមេសា ឆ្នាំ២០២១ ហើយលោកស្រីអភិបាលស្រុក បានបញ្ជាក់ថា ដោយមានការពាក់ព័ន្ធដោយផ្ទាល់ គឺសមាជិកគ្រួសាររបស់គាត់សរុបចំនួន០៧នាក់ ត្រូវបានពិនិត្យយកសំណាក ចំណែកអ្នកពាក់ព័ន្ធផ្សេងៗទៀតបានតម្រូវឲ្យធ្វើចត្តាឡីស័កនៅផ្ទះរបស់ខ្លួន និងមានការត្រួតពិនិត្យយ៉ាងម៉ត់ចត់ផងដែរ ។
យោងតាមសេចក្តីប្រកាសព័ត៌មានរបស់មន្ទីរសុខាភិបាល នៃរដ្ឋបាលខេត្តបាត់ដំបង នៅថ្ងៃទី២១ ខែមេសា ឆ្នាំ២០២១នេះ ថា បុរសមានវិជ្ជមានកូវីដ១៩នេះ កាលពីថ្ងៃទី១១ ខែមេសា បានដឹកម្នាស់ទៅលក់នៅផ្សារនាគមាស និងនៅថ្ងៃទី១២ បានត្រឡប់មកផ្ទះនៅបាត់ដំបងវិញជាមួយមនុស្សចំនួន០២នាក់ទៀត ។ សេចក្តីប្រកាសព័ត៌មានបន្តថា បន្ទាប់ពីមកដល់ផ្ទះវិញ បានសម្រាកនៅជាមួយប្រពន្ធ (ជាគ្រូបង្រៀន ដែលបានចាក់វ៉ាក់សាំងចំនួន២លើក) និងកូនចំនួន០២នាក់ទៀតប៉ះពាល់ជាមួយមិត្តភក្តិក្នុងភូមិចំនួន១៥នាក់ និងប៉ះពាល់ប្រយោលមនុស្សចំនួន២០នាក់កំពុងធ្វើចត្តាឡីស័កនៅអនុវិទ្យាល័យមោងឫស្សី ដែលអ្នកទាំងនោះសំណាកលើកទី០១គឺអវិជ្ជមាន ។
ប្រភពបន្ថែមថា បន្ទាប់ពីទទួលលទ្ធផលវិជ្ជមាន បុរសខាងលើត្រូវបានអាជ្ញាធរនាំមកព្យាបាលនៅមន្ទីរពេទ្យបង្អែកខេត្តបាត់ដំបង ហើយមន្ទីរសុខាភិបាលខេត្តកំពុងប្រកាសរកអ្នកបានប៉ះពាល់ដោយផ្ទាល់ ឬដោយប្រយោលជាមួយគាត់ ឬអ្នកធ្លាប់បានចេញចូលរកស៊ីម្នាស់ជាមួយគ្នានៅផ្សារនាគមាស សូមទំនាក់ទំនងបន្ទាន់តាមរយៈទូរស័ព្ទលេខ ០១២ ៤១៦ ២៤៧ និងមួយខ្សែទៀត ០១៧ ៦៤៦៩៦៦ ដើម្បីប្រឹក្សាសុខភាពនិងយកសំណាក ៕
