ឯកឧត្ដម គឹម សន្តិភាព រដ្ឋលេខាធិការ និងជាអ្នកនាំពាក្យក្រសួងយុត្តិធម៌ បានបញ្ជាក់ថា អ្នកដែលមានផ្ទុកមេរោគកូវីដ-១៩ ដែលគេចវេះពីការតម្រូវឲ្យទទួលការព្យាបាល ឬការប៉ុនប៉ងប្រព្រឹត្តអំពើនេះ នឹងទទួលការផ្តន្ទាទោសដាក់ពន្ធនាគារពី១ឆ្នាំ ទៅ៥ឆ្នាំ។
ការបញ្ជាក់របស់ ឯកឧត្ដម គឹម សន្តិភាព ខាងលើនេះ បន្ទាប់ពីអាជ្ញាធររាជធានីភ្នំពេញ បានឲ្យដឹងនៅយប់ថ្ងៃទី១១ ខែមេសា ឆ្នាំ២០២១នេះថា មានអ្នកជំងឺកូវីដ១៩ ចំនួន១៣នាក់ទៀត ក្នុងចំណោមអ្នកជំងឺ៥៦នាក់ ដែលរកឃើញមានជំងឺ កាលពីថ្ងៃទី៩ ខែមេសាកន្លងទៅនេះ បាននឹងកំពុងបន្តបាត់ខ្លួននៅឡើយ។ ក្នុងនោះ អាជ្ញាធររាជធានីភ្នំពេញ បានអំពាវនាវឲ្យអ្នកជំងឺបង្ហាញខ្លួន ឬទាក់ទងមកអាជ្ញាធរ ដើម្បីទទួលយកការព្យាបាល។
ឯកឧត្ដម គឹម សន្តិភាព រដ្ឋលេខាធិការ និងជាអ្នកនាំពាក្យក្រសួងយុត្តិធម៌ នៅយប់ថ្ងៃអាទិត្យនេះ បានបង្ហោះសារនៅលើទំព័រហ្វេសប៊ុកថា «អ្នកដែលមានផ្ទុកមេរោគកូវីដ-១៩ ដែលគេចវេះពីការតម្រូវឱ្យទទួលការព្យាបាល ឬការប៉ុនប៉ងប្រព្រឹត្តអំពើនេះ នឹងទទួលការផ្តន្ទាទោសដាក់ពន្ធនាគារពី១ឆ្នាំ ទៅ ៥ឆ្នាំ ហើយអំពើនេះនឹងត្រូវផ្តន្ទាទោសដាក់ពន្ធនាគារពី៥ឆ្នាំ ទៅ១០ឆ្នាំ កាលបើបណ្តាលឱ្យមានការចម្លងជំងឺកូវីដ-១៩ ដល់អ្នកដទៃ!»។
អ្នកនាំពាក្យក្រសួងយុត្តិធម៌ បានសង្កត់ធ្ងន់ថា «ហេតុសូមអ្នកដែលមានផ្ទុកមេរោគកូវីដ-១៩ ដែលអាជ្ញាធរមានសមត្ថកិច្ច ប្រកាសស្វែងរកទាំងអស់ សូមបង្ហាញខ្លួនជាបន្ទាន់ និងអោយបានទាន់ពេលវេលា នោះអ្នកនឹងអាចទទួលបានការលើកលែងឱ្យរួចផុតពីការទទួលខុសត្រូវ ឬទទួលបាននូវការសម្រាលការទទួលខុសត្រូវព្រហ្មទណ្ឌ!»៕